రియాల్టీ షో లైవ్ లో మైన‌ర్ బాలిక‌ను ముద్దుపెట్టుకున్న బాలీవుడ్ సింగర్ …సోష‌ల్ మీడియా లో రచ్చ

బాలీవుడ్ గాయకుడు, సంగీత‌ద‌ర్శ‌కుడు ప‌పోన్ అనుచిత‌వైఖ‌రిపై సోష‌ల్ మీడియా దుమ్మెత్తిపోస్తోంది. న్యాయ‌నిర్ణేత హోదాలో ప‌పోన్ ఓ మైన‌ర్ బాలిక‌ను ముద్దుపెట్టుకోవ‌డం వివాదాస్ప‌ద‌మ‌యింది. ఓ చాన‌ల్ లో ప్ర‌సార‌మ‌వుతున్న ది వాయిస్ ఇండియా కిడ్స్ అనే రియాల్టీ షోకి ప‌పోన్ జ‌డ్జిగా వ్య‌వ‌హ‌రిస్తున్నాడు. ఈ షోకి ఆయ‌న‌తో పాటు గాయ‌కులు షాన్, హిమేశ్ రేష్మియాలు కూడా న్యాయ‌నిర్ణేత‌లుగా ఉన్నారు. మంగ‌ళ‌వారం ఈ షోలో హోలీ కోసం స్పెషల్ ఎపిసోడ్ చిత్రీక‌రించారు.

ఈ సంద‌ర్భంగా ప‌పోన్ హోలీ పాట రంగ్ బ‌ర్సేను ఆల‌పించారు. అనంత‌రం హోలీ ఆడుతూ ఓ మైన‌ర్  బాలిక ద‌గ్గ‌ర‌కు వెళ్లి ఆమె  ముఖానికి రంగులుపూసి పెదాల‌పై ముద్దుపెట్టాడు. ఇది ఫేస్ బుక్ లైవ్ లో టెలికాస్ట్ అయింది. దీనికి సంబంధించిన వీడియో సోష‌ల్ మీడియాలో చ‌క్క‌ర్లుకొడుతోంది. వీడియో చూసిన నెటిజ‌న్లు ప‌పోన్ తీరుపై మండిప‌డుతున్నారు. ప‌పోన్ ప్ర‌వ‌ర్త‌న‌ను తీవ్రంగా ప‌రిగ‌ణించిన సుప్రీంకోర్టు న్యాయ‌వాది రుణ భుయాన్ బాల‌ల హ‌క్కుల సంర‌క్ష‌ణ కింద పోలీసుల‌కు ఫిర్యాదుచేశారు. ప‌పోన్ లైంగిక వేధింపుల‌కు పాల్ప‌డ్డాడ‌ని రుణ భుయాన్ ఆరోపించారు.

ఓ మైన‌ర్ బాలిక‌తో ప‌పోన్ ప్ర‌వ‌ర్తించిన తీరు, ఆమెకు రంగులు పూసి త‌ప్పుగా ముద్దుపెట్టుకోవ‌డం త‌న‌ను షాక్ కు గురిచేసింద‌ని, రుణ భుయాన్ అన్నారు. ఈ వీడియో చూసిన త‌ర్వాత దేశంలోని రియాల్టీ షోల‌లో పాల్గొంటున్న మైన‌ర్ బాలికల ర‌క్ష‌ణ‌, భ‌ద్ర‌త విష‌యంలో చాలా బాధ‌ప‌డ్డాన‌ని త‌న ఫిర్యాదులో పేర్కొన్నారు. రియాల్టీ షోల‌లో బాలిక‌ల‌తో వ్య‌వ‌హ‌రించాల్సిన తీరుపై సూచ‌న‌లు ఇవ్వాల‌ని కోరారు. అస్సామీ సింగ‌ర్ అయిన ప‌పోన్ అస‌లు పేరు అన్గ‌రాగ్ మ‌హంతా. బ‌ర్ఫీ, సుల్తాన్, ద‌మ్ లగా కే హైసా త‌దిత‌ర చిత్రాల్లో గాయ‌కుడిగా ఆయ‌న గుర్తింపు పొందాడు.