భారత్‌లో టిక్‌టాక్ నిషేధం తర్వాత ఇన్‌స్టాగ్రామ్ దూకుడు చూపిస్తోంది. ఆ చైనీస్ యాప్ బ్యాన్ ప్రయోజనాలను ఇన్‌స్టా ఇంకా పొందుతోంది. క్రమంగాా యూజర్లను ఆకర్షిస్తోంది. ముఖ్యంగా ఇన్‌స్టాగ్రామ్ రీల్స్‌ దుమ్మురేపుతోంది. టిక్‌టాక్ లేని లోటును పూడుస్తూ రోజురోజుకూ పాపులర్‌గా మారుతోంది. ఇదే దిశగా ఇన్‌స్టా సైతం వీడియోలపైనే ఎక్కువగా దృష్టి పెడుతూ యూజర్లను పెంచుకునేందుకు కొత్తకొత్త ఫీచర్లను తీసుకొస్తోంది. ఇదే క్రమంలో డౌన్‌లోడ్స్‌లోనూ ఇన్‌స్టాగ్రామ్ దూసుకెళుతోంది. 2021 నాలుగో క్వార్టర్‌ యాప్స్ డౌన్‌లోడ్‌ల గణాంకాల్లో ఇన్‌స్టా ప్రపంచంలో ఓవరాల్‌గా అగ్రస్థానంలో నిలిచింది.
యాప్ ఇంటెలిజెన్స్ సంస్థ సెన్సార్ టవర్ ఈ గణాంకాలను వెల్లడించింది. మిగిలిన వివరాలివే..2021 నాలుగో త్రైమాసికంలో ప్రపంచ వ్యాప్తంగా అత్యధిక డౌన్‌లోడ్‌లు సాధించిన నాన్ గేమింగ్ యాప్‌గా ఇన్‌స్టాగ్రామ్ నిలిచింది. గత రెండు సంవత్సరాల్లో టిక్‌టాక్ టాప్‌లో లేకపోవడం ఇది కేవలం రెండోసారే. భారత్‌లో టిక్‌టాక్ బ్యాన్ కావడంతో క్రమంగా ఎక్కువ మంది ఇన్‌స్టాగ్రామ్ వైపు మల్లుతున్నారు. ఈ ప్రభావం బాగా పడింది. దీంతో డౌన్‌లోడ్‌లలో Q3తో పోలిస్తే 10శాతం వృద్ధి కనపడింది.
ప్రపంచంలో ఓవరాల్‌గా 2021 Q4లో అత్యధిక ఇన్‌స్టాల్స్ సాధించిన నాన్ గేమింగ్ యాప్‌గా ఇన్‌స్టాగ్రామ్ టాప్‌లో నిలువగా.. రెండో స్థానాన్ని టిక్‌టాక్ దక్కించుకుంది. కాగా ఫేస్‌బుక్ మూడో స్థానంలో నిలిచింది. టాప్-3లో రెండు మెటా కు చెందిన యాప్స్ ఉండడం విశేషం.ఆ తర్వాత స్థానాల్లో వరుసగా వాట్సాప్ , టెలీగ్రామ్ , స్నాప్‌చాట్ , మెసెంజర్, షాపీ , మీషో , స్పాటిఫై ఉన్నాయి.
2021 నాలుగో త్రైమాసికంలో గూగుల్ ప్లే స్టోర్‌లో ఇన్‌స్టాగ్రామ్ హవా నడిచింది. ఇక రెండో స్థానాన్ని ఫేస్‌బుక్ దక్కించుకుంది. ఈ రెండు యాప్‌లో టాప్-2లో ఉండడం ఇది వరుసగా రెండోసారి. మూడో స్థానంలో టిక్‌టాక్ నిలిచింది. షాపీ, మీషో, స్నాప్‌చాట్, వాట్సాప్, టెలీగ్రామ్, మెసెంజెర్, స్పోటిఫై వరుసగా టాప్-10లో నిలిచాయి.
యాపిల్ యాప్ స్టోర్ లో డౌన్‌లోడ్‌ల విషయం భిన్నంగా ఉంది. 2021 నాలుగో త్రైమాసికంలో అత్యధిక డౌన్‌లోడ్‌ల లిస్ట్‌లో టిక్‌టాక్ అగ్రస్థానాన్ని నిలబెట్టుకుంది. ఆ తర్వాత టాాప్-3లో యూట్యూబ్ , వాట్సాప్ యాప్స్ ఉన్నాయి. ఇన్‌స్టాగ్రామ్ నాలుగో ప్లేస్ దక్కించుకుంది.ఇక ఫేస్‌బుక్, నేషనల్ యాంటీ ఫ్రాండ్ సెంటర్, మెసెంజర్, గూగుల్ మ్యాప్స్ , క్యాప్‌కట్ , జీమెయిల్ ఆ తర్వాతి ప్లే‌స్‌ల్లో నిలిచాయి. అయితే గూగుల్ ప్లే స్టోర్, యాపిల్ యాప్‌స్టోర్ మొత్తంగా కలిపి ఓవరాల్‌గా చూస్తే 2021 Q4లో ఇన్‌స్టాగ్రామ్ టాప్‌లో నిలిచింది.