మెగాస్టార్ చిరంజీవి ప్రస్తుతం నటిస్తున్న అవైటెడ్ చిత్రాల్లో ‘కాకా’ Kaaka ఒకటి. ‘వాల్తేరు వీరయ్య’ వంటి సెన్సేషనల్ హిట్ తర్వాత దర్శకుడు కొల్లి బాబీతో చిరంజీవి చేస్తున్న సినిమా కావడంతో ఈ ప్రాజెక్ట్పై భారీ అంచనాలు ఉన్నాయి. ఇప్పటికే సినిమాకు సంబంధించిన పలు అప్డేట్స్ అభిమానుల్లో ఆసక్తిని పెంచుతున్నాయి.
ముఖ్యంగా ‘కాకా’లో చిరంజీవి లుక్స్ ప్రేక్షకులకు ప్రత్యేక ట్రీట్ ఇవ్వనున్నట్లు మొదటి నుంచే టాక్ వినిపిస్తోంది. ఇటీవల విడుదలైన టైటిల్ గ్లింప్స్లో మెగాస్టార్ను సింపుల్ లుక్లో చూపించిన బాబీ, సినిమాలో ఆయనను మరిన్ని విభిన్నమైన గెటప్స్లో ప్రెజెంట్ చేయనున్నట్లు తెలుస్తోంది.
తాజాగా ప్రముఖ నిర్మాత, డిస్ట్రిబ్యూటర్ ఏషియన్ సునీల్ స్వగృహానికి చిరంజీవి వెళ్లారు. ఈ సందర్భంగా ఆయన క్యాప్ ధరించి, కాస్త రఫ్ లుక్లో కనిపించారు. ముఖ్యంగా చిన్నగా మెలితిప్పిన మీసంతో మెగాస్టార్ కనిపించడంతో అభిమానుల దృష్టి మొత్తం ఆయన లుక్పైనే పడింది.
దీంతో ఈ లుక్ ‘కాకా’ సినిమాలోని మరో గెటప్కు సంబంధించినదేనా అనే చర్చ మొదలైంది. బాబీ సినిమాలో చిరంజీవి కోసం మరిన్ని సర్ప్రైజింగ్ లుక్స్ సిద్ధం చేశారా అంటూ ఫ్యాన్స్ సోషల్ మీడియాలో ఆసక్తి వ్యక్తం చేస్తున్నారు.
ఇక ‘కాకా’ చిత్రానికి థమన్ సంగీతం అందిస్తున్నారు. కే వి ఎన్ ప్రొడక్షన్స్ బ్యానర్పై ఈ భారీ చిత్రాన్ని నిర్మిస్తున్నారు. వచ్చే ఏడాది సంక్రాంతి కానుకగా జనవరి 13న సినిమాను ప్రేక్షకుల ముందుకు తీసుకురానున్నట్లు మేకర్స్ ఇప్పటికే ప్రకటించారు.
చిరంజీవి, బాబీ కాంబినేషన్లో వస్తున్న ఈ సినిమా విడుదలకు ఇంకా సమయం ఉన్నప్పటికీ, మెగాస్టార్ లుక్స్పై వస్తున్న ప్రతి అప్డేట్ అభిమానుల్లో ఆసక్తిని పెంచుతోంది.
