టాలీవుడ్ మెగాస్టార్ చిరంజీవి ప్రస్తుతం తన బ్లాక్బస్టర్ దర్శకుడు కొల్లి బాబీతో కలిసి ‘కాకా’ Kaakaఅనే మాస్ అండ్ క్లాస్ యాక్షన్ డ్రామా చేస్తున్న సంగతి తెలిసిందే. భారీ అంచనాలతో తెరకెక్కుతున్న ఈ సినిమాను మేకర్స్ ఇప్పటికే సంక్రాంతి కానుకగా ప్రేక్షకుల ముందుకు తీసుకురావాలని నిర్ణయించారు. అయితే ఇప్పుడు చిరంజీవి గత చిత్రం ‘విశ్వంభర’ కూడా సంక్రాంతి బరిలోకి వచ్చే అవకాశాలు ఉన్నాయనే వార్తలు వినిపిస్తున్నాయి.
‘విశ్వంభర’కు సంబంధించిన ఓటీటీ డీల్ పూర్తయిన వెంటనే విడుదల తేదీపై అధికారిక ప్రకటన వచ్చే అవకాశం ఉందని టాక్ నడుస్తోంది. దీంతో ‘విశ్వంభర’ సంక్రాంతికి వస్తే ‘కాకా’ విడుదల వాయిదా పడటం ఖాయమని చాలామంది భావించారు. కానీ తాజాగా పరిస్థితులు అందుకు భిన్నంగా కనిపిస్తున్నాయి.
‘కాకా’ యూనిట్ మాత్రం తమ నిర్ణయం నుంచి వెనక్కి తగ్గే ఆలోచనలో లేదని తెలుస్తోంది. తాజాగా దర్శకుడు కొల్లి బాబీకి సంబంధించిన పోస్టర్ను కూడా మేకర్స్ విడుదల చేస్తూ, ‘కాకా’ జనవరి 13న థియేటర్లలోకి వస్తుందని మరోసారి స్పష్టం చేశారు. దీంతో విడుదల తేదీ విషయంలో తమ వైఖరి మార్చుకునే ప్రసక్తే లేదనే సంకేతాలను ఇచ్చారు.
ఒకవైపు ‘విశ్వంభర’ సంక్రాంతి రేసులోకి వచ్చే అవకాశం ఉండటం, మరోవైపు ‘కాకా’ యూనిట్ జనవరి 13 తేదీని కన్ఫర్మ్ చేస్తుండటంతో ఆసక్తికరమైన పరిస్థితి నెలకొంది. ఒకే హీరో నటించిన రెండు సినిమాలు ఒకే సంక్రాంతి సీజన్లో పోటీ పడితే పరిస్థితి ఎలా ఉంటుందనే చర్చ మొదలైంది.
అయితే ఈ క్లాష్ను పరిష్కరించే విషయంలో చివరి నిర్ణయం మెగాస్టార్ చిరంజీవిదే అయ్యే అవకాశం ఉంది. రెండు సినిమాలకు నష్టం కలగకుండా విడుదల తేదీలను సర్దుబాటు చేసే బాధ్యత కూడా ఆయనపైనే ఉండొచ్చనే అభిప్రాయాలు వ్యక్తమవుతున్నాయి.
మరి ‘కాకా’ వర్సెస్ ‘విశ్వంభర’గా మారుతున్న ఈ సంక్రాంతి పోటీ చివరకు ఎలా సర్దుమణుగుతుంది? రెండు సినిమాల్లో ఏది ముందుగా ప్రేక్షకుల ముందుకు వస్తుంది? అనేది అధికారిక ప్రకటన వచ్చే వరకు ఆసక్తికరంగానే ఉండనుంది.
