కరుడుగట్టిన నేరస్థుడు, దాదాపు 200 దేశాలకు మోస్ట్ వాంటెండ్‌ అయిన మెక్సికో డ్రగ్స్ ముఠా నాయకుడు బ్రెయిన్ డోనాసియానో ఓల్గుయిన్ వెర్డుగో అలియాస్ ఎల్ పిట్ ఎట్టకేలకు పోలీసులకు చిక్కాడు. కొలంబియాలో తన ప్రియురాలితో కలిసి ఉన్న అతడ్ని అరెస్ట్ చేశారు.
ఓ పర్యాటక ప్రాంతంలో ప్రియురాలితో గాఢ చుంబనం చేస్తూ దిగిన సెల్ఫీ అతడ్ని పట్టించింది. పిట్‌తో సెల్ఫీకి ఒప్పించిన ప్రియురాలు.. దానిని వెంటనే ఫేస్‌బుక్‌లో పోస్ట్ చేయడం.. అతడి ఆచూకీ పోలీసులకు క్షణల్లో తెలిసిపోవడం జరిగింది. దీంతో అతడ్ని కొలంబియాలోని కాలి నగరంలో ఓ విలాసవంతమైన అపార్ట్‌మెంట్‌లో అరెస్ట్ చేశారు.
ఈ ఏడాది ఫిబ్రవరిలో కొలంబియాలోకి ఎల్ పిట్ అడుగుపెట్టినట్టు అమెరికా డ్రగ్స్ అండ్ ఎన్‌ఫోర్స్‌మెంట్ ఏజెన్సీ గుర్తించింది. దీంతో కొలంబియా అధికారులను అప్రమత్తం చేసింది. కొలంబియా పోలీసుల కథనం ప్రకారం.. 39 ఏళ్ల ఎల్ పిట్ సాయుధులైన తన వర్గంతో కలిసి నగరాల్లో తిరుగుతున్నాడని తెలిపారు.
మెక్సికో, అమెరికాలకు భారీగా డ్రగ్స్ రవాణాలో భాగంగా మాజీ గెరిల్లా FARC సభ్యులను కలవడానికి అతడు కొలంబియాకు చేరుకున్నాడు. వారితో ఓ సమావేశంలో పాల్గొని ముగిసిన తర్వాత కాలి నగరంలోని తన ప్రియురాలిని కలవడానికి వచ్చాడు. ఈ సందర్భంగా జీసస్ భారీ విగ్రహం ఉండే లాస్ క్రిస్టల్స్‌ పర్యాటక ప్రదేశానికి వెళ్దామని అడగటంతో అతడు కాదనలేకపోయాడు. ఆమెతో కలిసి అక్కడకు వెళ్లి దొరికిపోయాడు.
కొలంబియాకు చెందిన ఎల్ టిఎంపో పత్రికను ఉటంకిస్తూ ది ఇండిపెండెంట్ వెలువరించిన కథనం ప్రకారం.. జీసస్ విగ్రహం వద్ద ప్రియురాలిని ముద్దుపెట్టుకుంటూ సెల్ఫీ దిగాడు. దానిని ఆమె వెంటనే ఫేస్‌బుక్‌లో పెట్టింది. అప్పటికే అతడిపై నిఘా ఉంచిన పోలీసులకు ఎల్ పిట్ ఆచూకీ తెలియడంతో రెండు వారాలు పాటు నిశితంగా గమనించారు.
చివరకు తన ప్రియురాలితో ఉన్న ప్రత్యేక ప్రాంతాన్ని ట్రాక్ చేశారు. అదునుచూసి ఏప్రిల్ ప్రారంభంలోనే డీఈఏ ఏజెంట్ల సాయంతో అతడి అపార్ట్‌మెంట్‌పై పోలీసులు దాడి చేసి అరెస్టు చేశారు. అయితే, అరెస్ట్ సమయంలో తనను వదిలిపెడితే 2.65 లక్షల డాలర్లు ఇస్తానని పోలీసులకు ఎల్ పిట్ ఆఫర్ ఇవ్వడం గమనార్హం.
అంతేకాదు, తాను మెక్సికోలో ఉన్నట్లయితే నా అనుచరులు ఇప్పటికే తనను తప్పించేవారని చెప్పడం మరో విశేషం. కొలంబియాలో అరెస్టయిన ఎల్ పిట్‌ను కొకైన్ అక్రమ రవాణా ఆరోపణలపై విచారణ కోసం కాలిఫోర్నియాకు తరలించనున్నారు. డ్రగ్స్ అక్రమ రవాణాకు సంబంధించి అతడిపై 196 దేశాల్లో ఇంటర్‌పోల్ రెడ్ వారెంట్ జారీ అయ్యింది.