టాలీవుడ్ నటుడు ప్రియదర్శి ప్రధాన పాత్రలో నటిస్తున్న తాజా చిత్రం ‘ఇడుపు కాయితం’ (Idupu Kayitham). తాజాగా విడుదలైన ఈ సినిమా టీజర్ ప్రేక్షకుల్లో ఆసక్తిని పెంచుతోంది. పెళ్లి వేడుకలతో ఆహ్లాదకరంగా ప్రారంభమైన కథ, విడాకుల పత్రం ప్రస్తావనతో అనూహ్యమైన మలుపు తిరగడం టీజర్‌కు ప్రత్యేక ఆకర్షణగా నిలిచింది.
నాగ దుర్గ కథానాయికగా నటిస్తున్న ఈ చిత్రానికి వంశీ రెడ్డి దొండపాటి దర్శకత్వం వహిస్తున్నారు. సుకుమార్ రైటింగ్స్, బన్నీ వాస్ వర్క్స్ సంస్థలు సంయుక్తంగా ఈ చిత్రాన్ని నిర్మిస్తున్నాయి.
అందమైన ప్రేమకథగా మొదలై.. ఆసక్తికర మలుపుతో!
పల్లెటూరి నేపథ్యంలో సంప్రదాయాలు, కుటుంబ బంధాల చుట్టూ ఈ కథ సాగుతుంది. ఇందులో శ్రీనివాస్ పాత్రలో ప్రియదర్శి, శ్రీలత పాత్రలో నాగ దుర్గ కనిపిస్తున్నారు. వీరిద్దరి పెళ్లి చూపులు, ప్రేమ, వివాహ వేడుకలతో టీజర్ ఎంతో ఆహ్లాదకరంగా మొదలవుతుంది. గ్రామీణ వాతావరణం, పెళ్లి సంబరాలు, జంట మధ్య సన్నివేశాలు చూస్తుంటే ఇదొక అందమైన ప్రేమకథ అనే భావన కలుగుతుంది.
పెళ్లి నుంచి విడాకుల వరకు.. అసలు కథేంటి?
అయితే కథలో అసలు ఆసక్తికరమైన అంశం ఆ తర్వాతే మొదలవుతుంది. పెళ్లి చేసుకున్న శ్రీనివాస్, శ్రీలతల జీవితంలోకి విడాకుల పత్రం ప్రస్తావన ఎందుకు వచ్చిందనేది టీజర్‌లో ఆసక్తిని రేకెత్తిస్తోంది. గ్రామీణ ప్రాంతాల్లో విడాకుల పత్రాన్ని సూచించే పదమే ‘ఇడుపు కాయితం’.
ఇక ఇరు కుటుంబాల మధ్య జరిగే వాదనలు, సంప్రదాయాల పేరుతో వచ్చే సరదా సంభాషణలు నవ్వులు పూయించేలా ఉన్నాయి. “మా దాంట్లో ఈ సంప్రదాయం లేదు.. మా దాంట్లో ఉంది” అంటూ సాగే సన్నివేశాలు గ్రామీణ హాస్యాన్ని గుర్తు చేస్తున్నాయి.
సంగీతం, సినిమాటోగ్రఫీ ప్రత్యేక ఆకర్షణ
ఈ చిత్రంలో అభినవ్ గోమఠం, గీతా భాస్కర్, బిత్తిరి సత్తి, శివజ్యోతి, మైమ్ మధు తదితరులు కీలక పాత్రల్లో నటించారు. సురేష్ బొబ్బిలి అందించిన జానపద శైలి సంగీతం, నేపథ్య సంగీతం టీజర్‌కు మరింత ఆకర్షణను తీసుకొచ్చాయి. ఎం.ఎన్. బాల్ రెడ్డి సినిమాటోగ్రఫీ పల్లెటూరి అందాలను సహజంగా చూపించింది. శ్రీధర్ సోంపల్లి ఎడిటింగ్ బాధ్యతలు నిర్వహిస్తున్నారు.
డిసెంబర్ 11న థియేటర్లలోకి!
బన్నీ వాస్, తబితా సుకుమార్ నిర్మిస్తున్న ఈ ఫ్యామిలీ ఎంటర్‌టైనర్‌ను డిసెంబర్ 11న ప్రపంచవ్యాప్తంగా థియేటర్లలో విడుదల చేయనున్నట్లు చిత్రబృందం టీజర్ ద్వారా ప్రకటించింది.
మొత్తానికి ప్రేమ, కుటుంబ భావోద్వేగాలు, గ్రామీణ హాస్యం కలగలిసిన ‘ఇడుపు కాయితం’ టీజర్ సినిమాపై ఆసక్తిని పెంచుతోంది. మరి ప్రియదర్శి ఈ చిత్రంతో ప్రేక్షకులను ఎంతవరకు అలరిస్తారో చూడాలి!