రౌడీ స్టార్ విజయ్ దేవరకొండ, నేషనల్ క్రష్ రష్మిక మందన్న జంటగా నటిస్తున్న భారీ హిస్టారికల్ యాక్షన్ మూవీ ‘రణబాలి’పై Ranabaali ప్రేక్షకుల్లో భారీ అంచనాలు నెలకొన్నాయి. దర్శకుడు రాహుల్ తెరకెక్కిస్తున్న ఈ చిత్రం నుంచి తాజాగా విడుదలైన ట్రైలర్ సినిమాపై ఆసక్తిని మరింత పెంచింది. ముఖ్యంగా ఇందులో కనిపించిన ఓ మిస్టరీ పాత్ర ఇప్పుడు సోషల్ మీడియాలో చర్చనీయాంశంగా మారింది.
ఇప్పటికే విడుదలైన టీజర్‌లో శింగనమల కొండపై ఉన్న ఓ గుహలో భారీ ఆకారంలో కనిపించిన వ్యక్తిని చూపించారు. ఆ పాత్ర ఎవరిది అనే విషయంపై అప్పటి నుంచే ప్రేక్షకుల్లో సందేహాలు మొదలయ్యాయి. మొదట ఆ పాత్రలో విజయ్ దేవరకొండనే నటించి ఉంటారని చాలామంది భావించారు. అయితే తాజాగా విడుదలైన ట్రైలర్‌తో ఆ పాత్ర విజయ్‌ది కాదనే విషయం స్పష్టమైనట్లు కనిపిస్తోంది.
ఇక ఈ మిస్టరీ పాత్రను పోషించిన నటుడు ఎవరనే విషయాన్ని మాత్రం చిత్రబృందం వెల్లడించలేదు. ప్రేక్షకులే ఆ నటుడిని గుర్తించాలని దర్శకుడు ఆసక్తికరంగా సవాల్ విసిరినట్లు తెలుస్తోంది. దీంతో ఈ పాత్ర వెనుక ఉన్న నటుడు ఎవరనే చర్చ మరింత జోరందుకుంది.
తాజాగా వినిపిస్తున్న అంచనాల ప్రకారం, ఆ పాత్రలో ప్రముఖ నటుడు లాల్ కనిపించే అవకాశం ఉందని అభిమానులు భావిస్తున్నారు. ‘పందెం కోడి’, ‘సాహో’ వంటి చిత్రాలతో పాటు ఇటీవల ‘ఓజీ’లోనూ కనిపించిన లాల్, ప్రొస్థెటిక్ మేకప్‌తో భద్రమల్లన్న పాత్రలో నటించి ఉండొచ్చనే ఊహాగానాలు వినిపిస్తున్నాయి. అయితే ట్రైలర్‌లో ఆయన లుక్ స్పష్టంగా కనిపించకపోవడంతో ఈ ప్రచారంపై ఇంకా అధికారిక నిర్ధారణ లేదు.
ఈ మిస్టరీ పాత్ర కథలో ఎంత కీలకంగా ఉండబోతోంది? భద్రమల్లన్నగా కనిపించేది నిజంగానే లాలేనా? అనే ప్రశ్నలకు సినిమా విడుదలతో సమాధానం లభించే అవకాశం ఉంది. మేకర్స్ ఈ పాత్రను రహస్యంగా ఉంచడం కూడా సినిమాపై ప్రేక్షకుల్లో ఉత్కంఠను పెంచుతోంది.
విజయ్ దేవరకొండ, రష్మిక మందన్న ప్రధాన పాత్రల్లో నటిస్తున్న ‘రణబాలి’లో ఈ సర్‌ప్రైజ్ ఎలిమెంట్ ఎలాంటి ప్రభావం చూపిస్తుందో చూడాలి. ప్రస్తుతం ఈ మిస్టరీ పాత్రపై జరుగుతున్న చర్చ నిజమవుతుందా లేదా అనేది అధికారిక ప్రకటనతోనే తేలనుంది.
