టాలీవుడ్ సెన్సేషనల్ స్టార్ విజయ్ దేవరకొండ హీరోగా, రష్మిక మందన్నా కథానాయికగా నటిస్తున్న తాజా చిత్రం ‘రణబాలి’ Ranabaali. దర్శకుడు రాహుల్ సంకృత్యాన్ తెరకెక్కిస్తున్న ఈ పీరియాడిక్ హిస్టారికల్ మూవీపై ఇప్పటికే భారీ అంచనాలు నెలకొన్నాయి. తాజాగా విడుదలైన టీజర్కు మంచి స్పందన రావడంతో విజయ్ దేవరకొండ అభిమానులు తమ హీరో ఈ సినిమాతో బలమైన కంబ్యాక్ ఇవ్వడం ఖాయమని భావిస్తున్నారు.
‘రణబాలి’ కథ స్వాతంత్ర్యానికి ముందు కాలం నేపథ్యంలో సాగనున్నట్లు టీజర్ను చూస్తే అర్థమవుతోంది. తెలుగు నేలకు చెందిన ఓ స్వాతంత్ర్య సమరయోధుడి జీవితాన్ని ఆధారంగా చేసుకుని ఈ చిత్రాన్ని రూపొందిస్తున్నట్లు మేకర్స్ గతంలోనే వెల్లడించారు. అప్పటి సామాజిక పరిస్థితులు, బ్రిటిష్ పాలనకు వ్యతిరేకంగా జరిగిన తిరుగుబాట్లు, పోరాటాలను సినిమాలో ప్రధానంగా చూపించబోతున్నట్లు తెలుస్తోంది.
అయితే తాజాగా వచ్చిన టీజర్లో చివర్లో కనిపించిన కొన్ని విజువల్స్ ఇప్పుడు ఆసక్తికరమైన చర్చకు దారితీశాయి. ఆ సన్నివేశాలను గమనిస్తే సినిమాలో ఫాంటసీ అంశాలకు కూడా చోటు ఉందా అనే సందేహం అభిమానుల్లో మొదలైంది. ఇప్పటివరకు ఇది నిజ జీవిత సంఘటనలు, చారిత్రక నేపథ్యంతో కూడిన కథగా భావించగా, టీజర్లోని ఆ విజువల్స్ మాత్రం కథలో కల్పిత లేదా ఫాంటసీ అంశాలు కూడా ఉండొచ్చనే ఆసక్తిని పెంచాయి.
ఒకవేళ నిజంగానే ఫాంటసీ టచ్ ఉంటే, చారిత్రక నేపథ్యానికి దాన్ని దర్శకుడు ఎలా జోడించారు? నిజ జీవిత సంఘటనల ఆధారంగా తెరకెక్కుతున్న కథలో ఏ అంశాలు వాస్తవమైనవి, ఏవి కల్పితమైనవి? అనే విషయాలు సినిమా విడుదలయ్యే వరకు సస్పెన్స్గానే ఉండనున్నాయి.
ఇక ‘రణబాలి’కి నేషనల్ అవార్డ్ విన్నర్ అజయ్-అతుల్ సంగీతం అందిస్తున్నారు. మైత్రి మూవీ మేకర్స్ భారీ స్థాయిలో నిర్మిస్తున్న ఈ సినిమా అక్టోబర్ 16న గ్రాండ్గా ప్రేక్షకుల ముందుకు రానుంది. టీజర్తోనే ఆసక్తిని పెంచిన ఈ చిత్రం థియేటర్లలో ఎలాంటి అనుభూతిని అందిస్తుందో చూడాలి.
