ఆ బాలికకు 14 ఏళ్లే.. పుస్తకాలంటే చాలా ఇష్టం.. బడికెళ్లి పాఠాలు వింటూ.. చదువుకోవడం ఇంకా ఇష్టం.. కానీ తల్లిదండ్రులు పుస్తకాలు పక్కన పెట్టి పుస్తెలు కట్టించుకోవాలని బలవంతం చేశారు. తెలియని వయస్సు.. తల్లిదండ్రులంటే భయం.. చేసేదేమీ లేక పెళ్లికి ఒప్పుకుంది. కానీ తన తోటి విద్యార్థులు మాత్రం ఈ విషయాన్ని జీర్ణించుకోలేక పోయారు.. ఎలాగైనా పెళ్లి ఆపాలని.. టీచర్లకి దగ్గరకెళ్లి విషయం చెప్పి.. వాళ్ల ద్వారా ఐసీడీఎస్‌కు ఫోన్ చేయించి ఎట్టకేలకు పెళ్లి ఆపించారు.
తూర్పుగోదావరి జిల్లా గొల్లప్రోలు మండలం చేబ్రోలుకు చెందిన 14 సంవత్సరాల బాలిక.. ప్రభుత్వ పాఠశాలలో 9వ తరగతి చదువుతోంది. ఆ బాలికకు భీమవరానికి చెందిన యువకుడితో వివాహం చేయాలని తల్లిదండ్రులు నిర్ణయించారు. పెళ్లి తనకు ఇష్టం లేదని.. చదువుకుంటానని బాలిక ఎంత చెప్పినా తల్లిదండ్రులు వినకుండా పెళ్లికి ముహూర్తం పెట్టేశారు. బుధవారం రాత్రే పెళ్లి.. మంగళవారం బాలికను పెళ్లి కూతుర్ని కూడా చేసేశారు.
అయితే.. నాలుగు రోజులుగా బాలిక స్కూల్‌కు రాకపోవడంతో.. ఏంటా అని విచారించిన తోటి విద్యార్థులకు పెళ్లి చేస్తున్నారని తెలిసింది. ఈ పెళ్లిని ఆపాలని నిర్ణయించుకున్నారు. దీంతో విషయాన్ని ఉపాధ్యాయుల దృష్టికి తీసుకెళ్లారు. వారు ఐసీడీఎస్ అధికారులకు సమాచారం ఇవ్వడంతో.. ఐడీసీఎస్ సూపర్‌వైజర్ మణి ఆధ్వర్యంలో సిబ్బంది మంగళవారం సాయంత్రం ఉదయం బాలిక ఇంటికి వెళ్లిని ఆపేశారు.
అంతేకాకుండా తల్లిదండ్రులతో పాటు అబ్బాయి తరఫు వాళ్లను కూడా హెచ్చరించి.. వయస్సు వచ్చేవరకూ పెళ్లి చేయకూడదని లెటర్ కూడా తీసుకున్నారు.పిల్లలందరూ కలిసి వేసిన ప్లాన్ సక్సెస్ కావడంతో ఆ బాలిక బుధవారం రోజు ఎప్పటిలాగే పుస్తకాలు పట్టుకుని స్కూలుకు హాజరైంది. 9వ తరగతి బాలిక మళ్లీ స్కూలుకు రావడంతో తోటి పిల్లలతో పాటు.. టీచర్లు కూడా ఎంతో సంతోషం వ్యక్తం చేశారు.