ఎక్కువ సేపు కదలకుండా.. అదే పనిగా కూర్చోవడం వల్ల భుజాలు తలను ముందుకు నెడతాయట. ఇది ఇంటర్‌వర్టబుల్ డిస్కులపై ఒత్తిడి ప్రభావం చూపడంతో ఈ సమస్య చివరకు కణజాలాలపై ఒత్తిడిని పెంచి స్పాండిలైటిస్ సహా దీర్ఘకాలిక మెడ, వెన్ను నొప్పికి దారితీస్తుందని వైద్య నిపుణులు చెప్తున్నారు.స్పాండిలైటిస్ అంటే మెడ నొప్పి అని అభివర్ణించవచ్చు. సాధారణంగా మెడనొప్పి తీవ్రంగా ఉండటంతో పాటు తల తిరగడం, తూలి పడిపోతున్నామనే భావన కలుగుతుంది.
స్పాండిలైటిస్, స్పాండిలోసిస్ పదాల విషయంలో చాలా మంది అయోమయం చెందుతారు. ఎందుకంటే రెండు ఒకేలా ఉంటాయి. కానీ లక్షణాలు మాత్రం విభిన్నంగా ఉంటాయి. స్పాండిలైటిస్ అనేది కీళ్లు, ఇతర మృదు కణజాలాలకు వ్యతిరేకంగా పనిచేసే రోగనిరోధక వ్యవస్థ వల్ల కలిగే వికార పరిస్థితి. స్పాండిలోసిస్ లేదా స్పైనల్ ఆర్థరైటిస్ అనేది వయస్సుతో పాటు వచ్చే అనారోగ్యం. పాత గాయాలు, సిట్టింగ్ పొజిషన్ లాంటివి స్పాండిలోసిస్ తీవ్రతను పెంచుతుంది.
స్పాండిలైటిస్ వ్యాధి లక్షణం నొప్పి, దృఢత్వం. మెడ నొప్పి అనేది ఇతర అనారోగ్య సమస్యలకు దారి తీస్తుంది. స్పాండిలైటిస్ వ్యాధి వల్ల కండరాల నొప్పులు, బలహీనత వేధిస్తాయి. స్పాండిలైటిస్ లక్షణాలు, తీవ్రత ఒక్కో వ్యక్తిలో ఒక్కోలా ఉంటుంది. అందువల్ల ఈ వ్యాధి వ్యక్తిని మారుతూ ఉంటుంది. చుట్టుపక్కల ఉండే నాడీ వ్యవస్థల నిర్మాణాలపై ఒత్తిడి పడటం, తిమ్మిరి, చేయి లేదా కాలు నొప్పి, కండరాల బలహీనత లాంటి లక్షణాలతో ఈ వ్యాధిని గుర్తించవచ్చు.
స్పాండిలైటిస్ వ్యాధి నివారణకు ఇప్పటివరకు సరైన మందు రాలేదు. ఈ వ్యాధిని నివారించాలంటే మీరు కూర్చున్న ప్రదేశం సరిగ్గా ఉండాలి. సౌకర్యవంతమైన సిట్టింగ్ పొజిషన్ ఉండటం వల్ల సమస్యను చాలా వరకు నియంత్రించవచ్చు. మీ పాదాలు నేలకు ఆనుకుని ఉండాలి. కుర్చీకి వెనుక ఆనుకుని విశ్రాంత స్థితిలో కూర్చోవాలి. కంప్యూటర్ స్క్రీన్ ఎగువ భాగం కంటికి 16 నుంచి 30 అంగుళాల దూరంలో ఉంచాలి. మోచేతులకు ఏదైనా సపోర్ట్ ఉండాలి. ప్రతి 60 నిమిషాలకు ఓ సారి 2 నుంచి 5 నిమిషాల పాటు విరామం తీసుకోవాలి.
చిన్న టవల్ లేదా దిండును బ్యాక్ సపోర్టుగా పెట్టుకోవాలి. కూర్చున్న స్థానం నుంచి అప్పుడప్పుడు లేచి వాకింగ్ చేస్తుండాలి. విశ్రాంతి తీసుకునే సమయంలో చేతులు, కాళ్లు సాగదీయడం, వ్యాయామం చేయడం లాంటివి చేయడం తప్పనిసరి. కుర్చీలో ఎక్కువసేపు కూర్చుని పని చేయడం వల్ల మెడ పట్టేసినట్లుగా ఉంటుంది. ఇలాంటప్పుడు మెడనొప్పి తగ్గాలంటే నెక్‌‌పిల్లో వాడొచ్చు. కుర్చీలో కూర్చుని నెక్ పిల్లో వాడితే రిలాక్సింగ్‌‌గా ఉంటుంది. తలకు, మెడకు ఎలాంటి ఒత్తిడి కలిగించకుండా నెక్ పిల్లో మెత్తగా ఉంటుంది.
వర్క్ చేస్తున్నప్పుడు సిట్టింగ్ పొజిషన్‌ను మెరుగుపరచడానికి తెలివిగా వ్యవహరించాలి. వెన్నును నిటారుగా ఉంచాలి. భుజం, చెవులు, తుంటిని ఓ వరుసలో ఉంచండి. ఒకే చోట ఉండకుండా కదలుతూ ఉండాలి. ఇది మీ కండరాలను సడలిస్తుంది. కీళ్లకు లూబ్రికెంట్లను అందిస్తుంది. అంతేకాకుండా రక్తప్రసరణను మెరుగుపరుస్తుంది. అలసటను తగ్గించి శక్తిని పెంచుతుంది. కంప్యూటర్ ముందు కూర్చోవడం వల్ల కలిగే సమస్యలను నివారించడానికి, చికిత్స చేయడానికి ఫిట్నెస్ సహాయపడుతుంది.
ఇది మీలో శక్తి, ఓర్పు, ఫ్లెక్సిబిలిటీని మెరుగుపరుస్తుంది. మెరుగైన గుండె ఆరోగ్యం కోసం వారానికి కనీసం 150 నిమిషాల మితమైన వ్యాయామం చేయాలి. ఇది బరువు పెరగడాన్ని అదుపులో చేస్తుంది. ఫిట్‌గా ఉండాలంటే ఏరోబిక్స్, జుంబా, సైక్లింగ్, ఈత, సింపుల్ వాకింగ్ లాంటివి చేయాలి. నిరంతరం నొప్పి, తిమ్మిరి, బలహీనత, దైనందిన కార్యకలాపాలకు ఆటంకం కలిగించే సమస్యలను ఎదుర్కొంటుంటే వైద్యుడిని సంప్రదించాలి. నొప్పి తీవ్రంగా ఉంటే తప్పనిసరిగా విశ్రాంతి తీసుకోవాలి.
ఎక్కువసేపు ల్యాప్‌‌టాప్‌, కంప్యూటర్ వంటి డిజిటల్‌ స్క్రీన్స్‌‌పై పనిచేయడం వల్ల కళ్లు చాలా అలసిపోతాయి. దీనివల్ల తలనొప్పి, యాంగ్జైటీ, నిద్రలేమి వంటి సమస్యలు వస్తుంటాయి. ఈ సమస్యలకు పరిష్కారంగా రిలాక్సింగ్‌ జెల్‌ ఐ మాస్క్‌ వాడాలి. కళ్లపై ఈ మాస్క్‌ పెట్టుకుంటే చాలా కూల్‌‌గా, రిలాక్సింగ్‌‌గా అనిపిస్తుంది.చైర్‌ లేదా సోఫాలో కూర్చున్నప్పుడు పాదాలు కూడా రిలాక్స్ అవ్వాలంటే ఫుట్‌ రెస్ట్‌ స్టూల్ వాడాలి. బీన్‌ బ్యాగ్స్‌‌లో ఇలాంటివి దొరుకుతున్నాయి. ఎక్కువసేపు పనిచేసి అలసిపోయినప్పుడు వీటిపై కాళ్లు చాపి రిలాక్స్ అవ్వొచ్చు.
వర్క్ చేసే గదిలో అరోమా ఆయిల్‌ డిఫ్యూజర్‌ ఉంచుకుంటే, మంచి సువాసన రిలాక్సింగ్‌ మూడ్‌ అందిస్తుంది. బ్రెయిన్‌ కూడా యాక్టివ్‌‌గా పనిచేస్తుంది. గ్లాసెస్‌ డిజిటల్‌ స్క్రీన్స్‌ నుంచి కలిగే ఒత్తిడిని తగ్గించేందుకు, కళ్లపై ఎక్కువ భారం పడకుండా ఉండేందుకు కళ్లద్దాలు వాడాలి. కంప్యూటర్ గ్లాసెస్‌ అందుబాటు ధరల్లోనే దొరుకుతున్నాయి. ఇవి స్క్రీన్స్‌‌పై నుంచి వచ్చే బ్లూ రేస్‌ ఎఫెక్ట్‌‌ను కూడా తగ్గిస్తాయి.
వర్క్ చేసేటప్పుడు రెగ్యులర్‌ టీ, కాఫీల బదులు గ్రీన్‌ టీ తాగితే చాలా ప్రయోజనం ఉంటుంది. ఇవి ఎనర్జీ ఇచ్చి, మంచి మూడ్‌ క్రియేట్‌ చేస్తాయి. ఒంట్లోని మలినాల్ని తొలగిస్తాయి. వర్క్ చేసేటప్పుడు కనీసం ఒకటి లేదా రెండు గ్రీన్‌ టీలు తాగితే మంచిది.ఎక్కువసేపు పనిచేసి బాడీ అలసినట్లుగా అనిపిస్తే హాట్‌ వాటర్ బ్యాగ్‌‌తో కాపడం పెట్టుకుంటే, బాడీ అంతా రిలాక్స్ అవుతుంది. అందుకే మార్కెట్లో దొరికే హాట్‌ వాటర్ బ్యాగ్స్‌ వాడాలి. చార్జింగ్‌ ద్వారా ఇందులోని నీళ్లు వేడవుతాయి. ఈ బ్యాగ్‌‌ను కావాల్సిన ప్లేస్‌‌లో ఉంచుకుంటే రిలాక్స్ అవ్వొచ్చు.