పెళ్ళయ్యాక మరో యువకుడితో వివాహేతర సంబంధం పెట్టుకున్న వివాహిత అతడిని వదిలి ఉండలేనని భావించి భర్తను వదిలించుకోవడానికి ఓ ప్లాన్ చేసి అందుకు తన తన స్నేహితురాలిని బలిచ్చింది. తన ప్రియుడి సహాయంతో ఫ్రెండ్ ని చంపేసి దానిని తాను ఆత్మహత్య చేసుకున్నట్టు క్రియేట్ చేయాలని ప్లాన్ చేసి విఫలమై పోలీసులకి చిక్కింది. ఈ ఘటన మహారాష్ట్రలోని ఔరంగాబాద్‌‌లో మే 24న చోటుచేసుకుంది. పోలీసులు వివరాల ప్రకారంఔరంగాబాద్‌కు చెందిన సోనాలీ షిండే (30)కి సదాశివ షిండే భార్యాభర్తలు. అయితే, చబ్బాదాస్ వైష్ణవ్ (26) అనే యువకుడితో సోనాలీకి ఏర్పడిన పరిచయం వివాహేతర సంబంధానికి దారితీసింది. ప్రియుడితో ఉండాలని నిర్ణయించుకున్న సోనాలీ, భర్తను వదిలించుకోడానికి పథకం వేసింది. ఇందులో భాగంగా తాను ఆత్మహత్యకు పాల్పడేలా భర్త ప్రేరేపించినట్టు చిత్రీకరించాలని ప్రయత్నించింది. పథకం ప్రకారం ప్రియుడి సాయంతో తన స్నేహితురాలు రుక్మన్‌బాయి మాలీ (31)ని హత్య చేసింది. అనంతరం స్నేహితురాలి మృతదేహానికి తన దుస్తులు, చెప్పులు, నగలు తొడిగింది. తన మృతికి భర్తే కారణమని, నిత్యమూ తాగొచ్చి అతడు తనను వేధిస్తుంటాని సూసైడ్ లేఖ రాసి, మృతదేహం పక్కనే ఉంచింది. తర్వాత మృతదేహంపై పెట్రోలు పోసి నిప్పటించింది. ఔరంగాబాద్ పట్టణంలోని పిసదేవాయ్ ప్రాంతంలోని వ్యవసాయ క్షేత్రంలో గుర్తుపట్టడానికి వీల్లేని విధంగా కాలిపోయిన ఓ మహిళ మృతదేహం పడి ఉన్నట్టు పోలీసులకు సమాచారం అందింది. అక్కడకు చేరుకున్న పోలీసులు మృతదేహాంతోపాటు పక్కనే ఉన్న సూసైడ్ లేఖను స్వాధీనం చేసుకున్నారు. అనుమానాస్పద కేసు నమోదుచేసిన పోలీసులు దర్యాప్తు చేపట్టారు. సూసైడ్ నోట్‌ ఆధారంగా సోనాలీ షిండే సోదరుడు అమోల్‌ని పిలిపించిన పోలీసులు, ఘటనా స్థలంలో లభించిన చెప్పులు, నగలను అతడికి చూపించారు. ఇవి తన సోదరివేనని అమోల్ ధ్రువీకరించడంతో పోస్ట్‌మార్టం తర్వాత మృతదేహాన్ని వారి కుటుంబసభ్యులకు అప్పగించగా, అంత్యక్రియలు జరిపించారు. అనంతరం సోనాలీ భర్తపై పోలీసులకు అమోల్ ఫిర్యాదు చేశాడు. ఇదే సమయంలో హర్సుల్‌కు చెందిన రుక్మన్ బాయి కూడా కనిపించడం లేదంటూ ఆమె కుటుంబసభ్యులు పోలీస్ స్టేషన్‌లో ఫిర్యాదు చేయడంతో సోనాలీ కుట్ర బయటకు వచ్చింది. దర్యాప్తులో సోనాలీ తన స్నేహితురాలిని హత్యచేసినట్టు గుర్తించారు. ప్రియుడితో కలిసి పారిపోయిన సోనాలీ షిర్డి, అహ్మద్‌నగర్, నాసిక్, సూరత్‌ లో పర్యటించినట్టు తేలింది. చివరకు ప్రియుడితో సహా చాలీస్‌ గావ్ రైల్వే స్టేషన్‌లో పట్టుకున్నారు. నిందితులు ఇద్దరినీ అరెస్ట్ చేసినట్టు పోలీసులు తెలిపారు.