డ్రైవింగ్ లైసెన్స్ లేకపోయినా కొందరు మైనర్లు రయ్యమంటూ రోడ్లపైకి వస్తున్నారు. డ్రైవింగ్ చేయడమే కాకుండా ఓవర్ స్పీడ్‌తో బైకులు నడుపుతూ ప్రమాదాలకు కారణమవుతున్నారు. కొందరు రోడ్డు ప్రమాదంలో ప్రాణాలు కోల్పోతున్నారు. తల్లిదండ్రులు కూాడా వారిని ఏమాత్రం పట్టించుకోవడం లేదన్న విమర్శలు కూడా వస్తున్నాయి. తాజాగా ఇలాంటి ఘటనే హైదరాబాద్ మియాపూర్ పరిధిలో చోటు చేసుకుంది.
ఓ ఇంజనీరింగ్ విద్యార్థి లైసెన్స్ లేకుండా బైక్ డ్రైవింగ్ చేయడమే కాకుండా ఓవర్ స్పీడ్ తో వెళ్లి ఒక గర్భిణీ స్త్రీని ఢీకొట్టాడు. దీంతో 8 నెలల గర్భిణీ స్త్రీ అక్కడికక్కడే మృతి చెందింది. సమాచారం అందుకున్న వెంటనే పోలీసులు సంఘటనా స్థలానికి చేరుకున్నారు అప్పటికి స్థానికులు నిందితుడిని పట్టుకున్నారు. సంఘటనా స్థలానికి చేరుకున్న పోలీసులు మృతదేహాన్ని పోస్టుమార్టం నిమిత్తం ప్రభుత్వ ఆస్పత్రికి తరలించి నిందితుడ్ని అదుపులోకి తీసుకుని కేసు నమోదు చేసుకుని దర్యాప్తు చేపట్టారు.