మామూలుగా ఘనమైన వారసత్వంతో వచ్చిన హీరోలు సినిమా సినిమాకు రేంజ్, మార్కెట్, ఫాలోయింగ్ పెంచుకుంటూ పైకి ఎదిగే ప్రయత్నం చేస్తుంటారు. కానీ అఖిల్ విషయంలో దీన్ని భిన్నంగా జరిగింది. తొలి సినిమాకు ఉన్న క్రేజ్, హైప్ ఆ తర్వాతి సినిమాలకు లేకపోయింది. గ్రాఫ్ కిందికి పడుతూ వచ్చింది.
‘మోస్ట్ ఎలిజిబుల్ బ్యాచిలర్’ విషయానికి వచ్చేసరికి ఇది హిట్టయితే చాలు అనే పరిస్థితి ఉంది తప్ప అఖిల్ స్టార్ అవుతాడా, అతడి ఇమేజ్‌ పెరుగుతుందా అన్న చర్చే లేదసలు. ఆ సినిమాపై అంచనాలు కూడా తక్కువే ఉన్నాయి. ఐతే సురేందర్ రెడ్డి లాంటి స్టార్ డైరెక్టర్‌తో అఖిల్ తన తర్వాతి చిత్రం చేయబోతుండటంతో అక్కినేని అభిమానుల్లో ఒక్కసారిగా ఉత్సాహం వచ్చింది. సోషల్ మీడియాలో చాలా కాలం తర్వాత వారి సందడి కనిపిస్తోంది.
అఖిల్‌ను మాస్ హీరోగా చూడాలన్న అక్కినేని ఆశలకు మళ్లీ రెక్కలొచ్చాయి. నాగచైతన్య ఫెయిలైన ఈ విషయంలో అఖిల్ సక్సెస్ అవుతాడన్న ఆశ మళ్లీ ఇప్పుడు వారిలో చిగురిస్తోంది. హీరోయిజాన్ని ఎలివేట్ చేయడంలో, మాస్‌ను మెప్పించడంలో సురేందర్ స్టైలే వేరు. కొంచెం ముందుగానే ఇలాంటి దర్శకుడు అఖిల్‌కు పడి ఉంటే అతడి కెరీర్ ఇలా ఉండేది కాదేమో.
ఐతే అయ్యిందేదో అయ్యింది.. ‘మోస్ట్ ఎలిజిబుల్ బ్యాచిలర్’తో తొలి విజయాన్నందుకుని.. ఆ తర్వాత సురేందర్ మార్క్ మాస్ ఎంటర్టైనర్‌లో నటిస్తే అఖిల్ కెరీర్లో మార్పు వస్తుందని తాము కోరుకున్నట్లే అతను మాస్ హీరో అవుతాడని అక్కినేని అభిమానులు ఆశిస్తున్నారు.