ఐకాన్ స్టార్ అల్లు అర్జున్ హీరోగా, దర్శకుడు అట్లీ తెరకెక్కిస్తున్న భారీ ప్రాజెక్ట్ ‘రాకా’ Raaka పై ఇప్పటికే భారీ అంచనాలు నెలకొన్నాయి. ఇంటర్నేషనల్ స్థాయి విజువల్స్‌తో రూపొందుతున్న ఈ సినిమా కోసం అభిమానులు ఎంతో ఆసక్తిగా ఎదురుచూస్తున్నారు.
అయితే, తాజాగా ఈ సినిమా షూటింగ్‌కు సంబంధించి వినిపిస్తున్న ఓ వార్త బన్నీ అభిమానులను ఆశ్చర్యానికి గురిచేస్తోంది. ఇప్పటివరకు సినిమా చిత్రీకరణ కేవలం 40 శాతం లోపే పూర్తయిందనే ప్రచారం ఫిల్మ్ నగర్ వర్గాల్లో వినిపిస్తోంది.
రెండేళ్లుగా షూటింగ్.. ఇంకా 40 శాతమేనా?
దాదాపు రెండేళ్లుగా ఈ సినిమా షూటింగ్ కొనసాగుతున్నట్లు తెలుస్తోంది. ముఖ్యంగా ముంబైలోని వివిధ స్టూడియోల్లో ఎక్కువ భాగం చిత్రీకరణ జరుగుతున్నట్లు సమాచారం. ఇంతకాలం షూటింగ్ జరిగిన తర్వాత కూడా ఇంకా 40 శాతం మాత్రమే పూర్తయిందనే వార్త అభిమానుల్లో సందేహాలు రేకెత్తిస్తోంది.
ఈ సినిమా చిత్రీకరణ పురోగతిపై ఇప్పటివరకు ఎలాంటి అధికారిక స్పష్టత లేదు. దీంతో ప్రస్తుతం వినిపిస్తున్న వార్తల్లో నిజమెంత అనేది తెలియాల్సి ఉంది.
భారీ బడ్జెట్‌తో ‘రాకా’
ఈ చిత్రానికి సాయి అభ్యంకర్ సంగీతం అందిస్తున్నారు. సన్ పిక్చర్స్ భారీ వ్యయంతో నిర్మిస్తోంది. అట్లీ దర్శకత్వంలో అల్లు అర్జున్ నటిస్తున్న ఈ ప్రాజెక్ట్‌పై అంచనాలు భారీగా ఉండటంతో, సినిమా షూటింగ్ ఎప్పుడు పూర్తవుతుందనే ఆసక్తి అభిమానుల్లో నెలకొంది.
