కోలీవుడ్‌లో కమర్షియల్ సినిమాలకు తనదైన స్టైల్‌ను తీసుకొచ్చిన దర్శకుల్లో అట్లీ ఒకరు. ఇప్పటివరకు ఆయన తెరకెక్కించిన సినిమాలు బాక్సాఫీస్ వద్ద మంచి విజయాలను అందుకోవడంతో స్టార్ డైరెక్టర్‌గా తనకంటూ ప్రత్యేక గుర్తింపు తెచ్చుకున్నారు. ఇప్పుడు అల్లు అర్జున్‌తో కలిసి తెరకెక్కిస్తున్న ‘రాకా’పై కూడా భారీ అంచనాలు నెలకొన్నాయి.
ఈ నేపథ్యంలో అట్లీ చేసిన తాజా వ్యాఖ్యలు ఇప్పుడు సినీ వర్గాల్లో చర్చకు దారితీశాయి. తన తదుపరి సినిమా ‘రాకా’ను ఆస్కార్ స్థాయికి తీసుకెళ్లాలనే లక్ష్యంతో పనిచేస్తున్నట్లు ఆయన చెప్పడం ఆసక్తికరంగా మారింది. సాధారణంగా దర్శకులు తమ సినిమాపై నమ్మకంగా మాట్లాడటం సహజమే అయినప్పటికీ, నేరుగా ఆస్కార్‌ను టార్గెట్ చేస్తున్నట్లు చెప్పడంతో ఈ వ్యాఖ్యలపై భిన్నాభిప్రాయాలు వ్యక్తమవుతున్నాయి.
అట్లీ ఇప్పటివరకు కమర్షియల్ సినిమాల ద్వారా తన సత్తా చాటుకున్నారు. అయితే ఆయన గత చిత్రాలను పరిశీలిస్తే ఆస్కార్ స్థాయిలో అంతర్జాతీయంగా గుర్తింపు పొందే సినిమాను రూపొందించిన అనుభవం ఇంకా లేదు. అందుకే ‘రాకా’తో Raaka నేరుగా ఆస్కార్‌పై కన్నేయడం కాస్త ఎక్కువ కాన్ఫిడెన్స్‌గా ఉందనే అభిప్రాయాలు వినిపిస్తున్నాయి.
మరోవైపు, అట్లీ సినిమాలపై మొదటి నుంచీ ఒక ప్రత్యేకమైన చర్చ ఉంది. భారీ కమర్షియల్ అంశాలు, స్టార్ హీరోల ఇమేజ్, ఎమోషనల్ కథనాలను కలిపి సినిమాలు తెరకెక్కించడం ఆయన శైలిగా మారింది. గతంలో ఆయన సినిమాలపై శంకర్ ప్రభావం కనిపిస్తుందనే అభిప్రాయాలు కూడా వ్యక్తమయ్యాయి. అయితే అట్లీ మాత్రం తనదైన ఫార్ములాతో వరుస విజయాలు సాధిస్తూ ప్రత్యేక గుర్తింపు తెచ్చుకున్నారు.
ఇప్పుడు అల్లు అర్జున్ వంటి పాన్ ఇండియా స్టార్‌తో చేస్తున్న ‘రాకా’ ఆయన కెరీర్‌లో మరో కీలక చిత్రంగా మారనుంది. ఈ సినిమా కథ, మేకింగ్, టెక్నికల్ స్టాండర్డ్స్ అంతర్జాతీయ స్థాయిలో ఉంటే అట్లీ చెప్పిన ఆస్కార్ టార్గెట్‌కు బలం చేకూరే అవకాశం ఉంది.
అయితే సినిమా విడుదలకు ముందే ఆస్కార్ గురించి ఇంత పెద్ద లక్ష్యాన్ని ప్రకటించడం ఎంతవరకు వర్కౌట్ అవుతుందనేది ఆసక్తికరంగా మారింది. ‘రాకా’ నిజంగానే అట్లీ కాన్ఫిడెన్స్‌కు తగ్గ స్థాయిలో ఉంటుందా? లేక భారీ అంచనాలతో వచ్చిన ఇతర సినిమాల మాదిరిగానే ఈ స్టేట్‌మెంట్‌పై కూడా తర్వాత చర్చ జరుగుతుందా? అనేది సినిమా విడుదలైన తర్వాతే స్పష్టమవుతుంది.
