సూపర్ స్టార్ రజినీకాంత్, దర్శకుడు నెల్సన్ దిలీప్‌కుమార్ కాంబినేషన్‌లో తెరకెక్కుతున్న మోస్ట్ అవైటెడ్ సీక్వెల్ ‘జైలర్ 2’ Jailer 2. మొదటి భాగం సాధించిన భారీ విజయంతో ఈ సినిమాపై మొదటి నుంచే భారీ అంచనాలు నెలకొన్నాయి. తాజాగా మేకర్స్ తెలుగు, తమిళ, హిందీ భాషల్లో విడుదల చేసిన ట్రైలర్‌తో సినిమాపై ఉన్న హైప్ మరింత పెరిగింది.
ట్రైలర్‌లో రజినీకాంత్ మాస్ యాక్షన్‌తో పాటు పలువురు ప్రముఖ నటీనటుల పాత్రలను కూడా చూపించారు. ముఖ్యంగా మోహన్‌లాల్, శివరాజ్‌కుమార్ వంటి స్టార్స్‌ ప్రెజెన్స్‌ను స్పష్టంగా రివీల్ చేశారు. దీంతో సినిమాలోని కీలక పాత్రలపై ఇప్పటికే ప్రేక్షకులకు కొంత క్లారిటీ వచ్చింది.
అయితే ఒక స్టార్ హీరో విషయంలో మాత్రం మేకర్స్ పూర్తిగా సస్పెన్స్ మెయింటైన్ చేసినట్లు కనిపిస్తోంది. బాలీవుడ్ స్టార్ హృతిక్ రోషన్ కూడా ‘జైలర్ 2’లో కీలక పాత్రలో కనిపించనున్నట్లు ప్రచారం జరుగుతున్నప్పటికీ, తాజాగా విడుదలైన ట్రైలర్‌లో ఆయనకు సంబంధించిన ఎలాంటి విజువల్ హింట్ కూడా ఇవ్వలేదు.
దీంతో హృతిక్ రోషన్ పాత్రను కావాలనే దాచిపెట్టారా? అనే చర్చ మొదలైంది. ఒకవేళ ఆయన పాత్ర నిజంగానే సినిమాలో ఉంటే, నేరుగా థియేటర్లలోనే ప్రేక్షకులకు సర్‌ప్రైజ్ ఇవ్వాలనే ఉద్దేశంతో మేకర్స్ ఈ విషయాన్ని రహస్యంగా ఉంచుతున్నారనే టాక్ వినిపిస్తోంది.
నెల్సన్ దిలీప్‌కుమార్ సినిమాల్లో సర్‌ప్రైజ్ ఎలిమెంట్స్‌కు ప్రత్యేక ప్రాధాన్యత ఉంటుంది. ఈ నేపథ్యంలో హృతిక్ రోషన్ పాత్రను ట్రైలర్‌కు దూరంగా ఉంచడం కూడా ప్రమోషనల్ స్ట్రాటజీలో భాగమే కావచ్చని అభిమానులు భావిస్తున్నారు. మరి ఈ సీక్రెట్‌ను దర్శకుడు నెల్సన్ ఎలా హ్యాండిల్ చేశారో సినిమా విడుదల తర్వాతే తెలుస్తుంది.
అనిరుధ్ రవిచందర్ సంగీతం అందిస్తున్న ఈ భారీ యాక్షన్ ఎంటర్‌టైనర్‌ను సన్ పిక్చర్స్ నిర్మిస్తోంది. రజినీకాంత్‌తో పాటు పలువురు స్టార్ నటీనటులు భాగమైన ఈ చిత్రం అక్టోబర్ 15న ప్రేక్షకుల ముందుకు రానుంది.
