నందమూరి బాలకృష్ణ, దర్శకుడు గోపీచంద్ మలినేని కలయికలో తెరకెక్కుతున్న చిత్రం ‘దాదా’పై Dada ప్రేక్షకుల్లో భారీ అంచనాలు నెలకొన్నాయి. ఇప్పటికే ఈ సినిమా నుంచి ప్రమోషన్స్ ప్రారంభమయ్యాయి. ఇందులో భాగంగా ‘దాదా ధమాకా’ పేరుతో రూపొందించిన తొలి పాటను నవంబర్ 13న విడుదల చేయనున్నారు.
డబ్బింగ్ పనులు ప్రారంభించనున్న బాలయ్య
ప్రస్తుతం ఈ సినిమా పోస్ట్ ప్రొడక్షన్ పనులు వేగంగా జరుగుతున్నట్లు సమాచారం. ఈ నేపథ్యంలో ఈ వారం చివర్లో పూర్తయిన షూటింగ్ భాగానికి బాలకృష్ణ డబ్బింగ్ చెప్పనున్నారని తెలుస్తోంది. అయితే సినిమాలో మరో కీలక షెడ్యూల్ షూటింగ్ చేయాల్సి ఉందని సమాచారం. డిసెంబర్ 24, 2026న సినిమాను విడుదల చేయాలని మేకర్స్ ప్లాన్ చేస్తున్న నేపథ్యంలో మిగిలిన పనులను వేగంగా పూర్తి చేసే దిశగా అడుగులు వేస్తున్నారు.
భారీ తారాగణంతో ‘దాదా’
ఈ సినిమాలో కాజల్ అగర్వాల్, సముద్రఖని కీలక పాత్రల్లో నటిస్తున్నారు. మంచు మనోజ్ కూడా ఓ ముఖ్యమైన పాత్రలో కనిపించనున్నారు. బాలకృష్ణ ఈ చిత్రం కోసం సరికొత్త మేకోవర్‌లో కనిపించబోతుండటం మరో ప్రత్యేక ఆకర్షణగా నిలవనుంది.
గతంలో బాలకృష్ణ, గోపీచంద్ మలినేని కలయికలో వచ్చిన ‘వీరసింహారెడ్డి’ మంచి విజయాన్ని అందుకుంది. ఇప్పుడు వీరిద్దరి కాంబినేషన్‌లో వస్తున్న రెండో సినిమా కావడంతో ‘దాదా’పై అంచనాలు పెరిగాయి. వృద్ధి సినిమాస్ పతాకంపై వెంకట సతీశ్ కిలారు ఈ చిత్రాన్ని నిర్మిస్తున్నారు.
మరి ‘దాదా’తో బాలయ్య మరోసారి బాక్సాఫీస్ వద్ద ఎలాంటి సందడి చేస్తారో చూడాలి!
