మెగాస్టార్ చిరంజీవి హీరోగా యువ దర్శకుడు మల్లిడి వశిష్ట దర్శకత్వంలో ఆయన కెరీర్ 156వ మూవీ తాజాగా గ్రాండ్ లెవల్లో పూజా కార్యక్రమాలతో మొదలైన విషయం తెలిసిందే. యువి క్రియేషన్స్ సంస్థ పై భారీ స్థాయిలో వంశీ, ప్రమోద్ నిర్మించనున్న ఈ మూవీ సోషియో ఫాంటసీ ఎంటర్టైనర్ గా రూపొందనుండగా కీరవాణి సంగీతాన్ని, చోట కె నాయుడు ఫోటోగ్రఫిని అందించనున్నారు. నవంబర్ నుండి రెగ్యులర్ షూటింగ్ ప్రారంభం కానున్న ఈ సినిమా కి సంబంధించి ప్రస్తుతం ఒక క్రేజీ న్యూస్ అయితే టాలీవుడ్ లో బజ్ గా ప్రచారం అవుతోంది.
దాని ప్రకారం ఈ సినిమా లో విలన్ గా దగ్గుబాటి రానా కనిపించనున్నారని అంటున్నారు. బాహుబలి సిరీస్ లోని రెండు మూవీ ల్లో భళ్లాలదేవుని పాత్రలో అత్యద్భుతంగా పెర్ఫార్మన్స్ కనబరిచి అందరినీ ఆకట్టుకున్న రానా, ఈ సినిమా లో మరింత క్రూరమైన పాత్రలో కనిపినించనున్నారట. హాలీవుడ్ మార్వెల్ కామిక్స్ లోని లోకి పాత్ర మాదిరిగా ఈ సినిమా లో రానా పాత్రని అద్భుతంగా తీర్చిదిద్దారట దర్శకుడు వశిష్ట. కాగా ఈ సినిమా గురించి మరిన్ని విషయాలు త్వరలో అధికారికంగా వెల్లడి కానున్నాయి.
