మంచు మనోజ్ హీరోగా నటిస్తున్న క్రేజీ ప్రాజెక్టుల్లో ‘డేవిడ్ రెడ్డి’ David Reddy కూడా ఒకటి. దర్శకుడు హనుమా రెడ్డి ఎక్కంటి తెరకెక్కిస్తున్న ఈ భారీ యాక్షన్ ఎంటర్టైనర్పై ఇప్పటికే మంచి అంచనాలు నెలకొన్నాయి. ఇప్పటివరకు విడుదలైన పోస్టర్లు, టీజర్ సినిమాపై ఆసక్తిని పెంచగా, తాజాగా మేకర్స్ మరో ఇంట్రెస్టింగ్ అప్డేట్ను ప్రేక్షకుల ముందుకు తీసుకొచ్చారు.
ప్రముఖ నటి రమ్యకృష్ణ పుట్టినరోజు సందర్భంగా ఆమెకు ప్రత్యేకంగా విషెస్ చెబుతూ ‘డేవిడ్ రెడ్డి’లో ఆమె ఫస్ట్ లుక్ను మేకర్స్ విడుదల చేశారు. ఈ పోస్టర్లో రమ్యకృష్ణ ఎంతో పవర్ఫుల్గా, ఇంటెన్స్ లుక్లో కనిపిస్తున్నారు. చేతిలో కటానా పట్టుకుని, కుర్చీలో గంభీరంగా కూర్చున్న ఆమె లుక్ సినిమాపై మరింత క్యూరియాసిటీని పెంచుతోంది.
ఇక సినిమాలో రమ్యకృష్ణ ‘కమలా రెడ్డి’ అనే కీలకమైన పాత్రలో కనిపించనున్నట్లు మేకర్స్ వెల్లడించారు. పోస్టర్ను చూస్తుంటే ఈ పాత్రలో ఆమె మరోసారి తనదైన మాస్ ఇంపాక్ట్ చూపించబోతున్నారనే అభిప్రాయాలు వ్యక్తమవుతున్నాయి. ముఖ్యంగా ‘బాహుబలి’లో శివగామిగా ఆమె పోషించిన పవర్ఫుల్ పాత్రను గుర్తు చేసేలా ఈ లుక్ ఉండటంతో, ‘డేవిడ్ రెడ్డి’లో ఆమె పాత్ర కూడా అదే స్థాయిలో ఉంటుందా అనే ఆసక్తి నెలకొంది.
అయితే కమలా రెడ్డి పాత్ర స్వభావం ఏమిటి? కథలో ఆమె పాత్రకు ఎలాంటి ప్రాధాన్యత ఉంది? రమ్యకృష్ణ తన నటనతో మరోసారి శివగామి స్థాయి ఇంపాక్ట్ క్రియేట్ చేస్తారా? అనే విషయాలు తెలియాలంటే సినిమా విడుదల వరకు వేచి చూడాల్సిందే.
ఈ చిత్రానికి ప్రముఖ సంగీత దర్శకుడు రవి బస్రూర్ సంగీతం అందిస్తున్నారు. భరత్ మోతుకూరి, నల్లగంగుల వెంకట రెడ్డి కలిసి ఈ చిత్రాన్ని నిర్మిస్తున్నారు. భారీ యాక్షన్ అంశాలతో తెరకెక్కుతున్న ‘డేవిడ్ రెడ్డి’ త్వరలోనే పాన్ ఇండియా స్థాయిలో ప్రేక్షకుల ముందుకు రానుంది.
