Don’t Trouble The Trouble సినిమాపై టీజర్ విడుదలతో ఆసక్తి పెరిగింది. ఎస్.ఎస్. రాజమౌళి సమర్పణలో ఫహాద్ ఫాజిల్ హీరోగా తెరకెక్కుతున్న ఈ చిత్రానికి శశాంక్ యేలేటి దర్శకత్వం వహిస్తున్నారు. తాజాగా జరిగిన టీజర్ లాంచ్ ఈవెంట్లో నిర్మాత ఎస్.ఎస్. కార్తికేయ సినిమా గురించి పలు ఆసక్తికర విషయాలను వెల్లడించారు.
ఆర్కా మీడియా వర్క్స్, షోయింగ్ బిజినెస్ బ్యానర్లపై శోభు యార్లగడ్డ, ప్రసాద్ దేవినేని, ఎస్.ఎస్. కార్తికేయ సంయుక్తంగా ఈ చిత్రాన్ని నిర్మిస్తున్నారు. సెప్టెంబర్ 11న ఈ సినిమాను థియేటర్లలో విడుదల చేయనున్నారు.
రాజమౌళి ఓకే చెప్పాకే స్క్రిప్ట్ లాక్
ఈ సందర్భంగా కార్తికేయ మాట్లాడుతూ.. ‘పుష్ప’ విడుదలకు ముందే ఫహాద్ ఫాజిల్తో ఈ ప్రాజెక్ట్ ఓకే అయినట్లు తెలిపారు. తొలి నెరేషన్లోనే ఫహాద్కు కథ బాగా నచ్చిందని, వెంటనే గ్రీన్ సిగ్నల్ ఇచ్చారని చెప్పారు.
రాజమౌళి స్క్రిప్ట్ను పరిశీలించి ఓకే చెప్పిన తర్వాతే కథను లాక్ చేసినట్లు కార్తికేయ వెల్లడించారు. ఇప్పటికే సినిమా ఫస్ట్ కాపీని ఆయనకు చూపించామని, రాజమౌళి సూచించిన కొన్ని చిన్న మార్పులపై ప్రస్తుతం పని చేస్తున్నట్లు తెలిపారు. ఈ చిత్రంలో వీఎఫ్ఎక్స్కు ఎక్కువ ప్రాధాన్యం ఉంటుందని చెప్పారు.
Don’t Trouble The Trouble టైటిల్ వెనుక అసలు కారణం
‘డోంట్ ట్రబుల్ ది ట్రబుల్’ అనే డైలాగ్ బాలకృష్ణ నటించిన ‘శ్రీమన్నారాయణ’ సినిమాతో బాగా పాపులర్ అయింది. అదే డైలాగ్ను సినిమా టైటిల్గా ఎందుకు ఎంచుకున్నారనే ప్రశ్నకు కార్తికేయ ఆసక్తికర సమాధానం ఇచ్చారు.
ఈ ఫ్రేజ్ అందరికీ తెలిసినదేనని, బాలయ్య వల్ల మరింత పాపులర్ అయిందని చెప్పారు. సినిమాలోని చిన్నారి పాత్ర చాలా మాస్గా ఉంటుందని, ఆ పాత్రే అసలైన ‘ట్రబుల్’ అని వివరించారు. Don’t Trouble The Trouble టైటిల్ కథకు సరిగ్గా సరిపోతుందని భావించి ఫిక్స్ చేసినట్లు కార్తికేయ వెల్లడించారు.
తెలుగులో నేరుగా ఒక సినిమా చేయాలని చాలాకాలంగా ఎదురుచూస్తున్న తనకు ఈ కథ ఎంతో నచ్చిందని ఫహాద్ ఫాజిల్ తెలిపారు. ఫాంటసీ డ్రామా ఎలిమెంట్స్తో రూపొందుతున్న ఈ చిత్రం ప్రేక్షకులకు కొత్త తరహా వినోదాన్ని అందిస్తుందని చిత్రబృందం చెబుతోంది.
