మలయాళ స్టార్ హీరో దుల్కర్ సల్మాన్ Dulquer Salmaan నటించిన తాజా చిత్రం ‘ఐ యామ్ గేమ్’ ఎట్టకేలకు ప్రేక్షకుల ముందుకు వచ్చింది. ‘ఆర్డీఎక్స్’ ఫేమ్ నహాస్ హిదాయత్ దర్శకత్వం వహించిన ఈ సినిమాను వేఫేరర్ ఫిల్మ్స్ బ్యానర్పై తెరకెక్కించారు. దుల్కర్ సల్మాన్ కెరీర్లో 40వ సినిమాగా రూపొందడంతో విడుదలకు ముందే ఈ మూవీపై ఆసక్తి నెలకొంది. అయితే థియేటర్లలో సినిమా చూసిన ప్రేక్షకుల నుంచి ప్రస్తుతం మిశ్రమ స్పందన వస్తోంది.
ఫస్ట్ హాఫ్లో యాక్షన్ హైలైట్
‘ఐ యామ్ గేమ్’లో దుల్కర్ సల్మాన్ ‘డాన్ జాన్’ అనే లక్కీ గ్యాంబ్లర్ పాత్రలో కనిపించారు. ఫాంటసీ టచ్తో కూడిన కథకు యాక్షన్ను జోడిస్తూ ఫస్ట్ హాఫ్ను ఆసక్తికరంగా నడిపించారు. ముఖ్యంగా బార్ ఫైట్, ఇంటర్వెల్కు ముందు వచ్చే యాక్షన్ ఎపిసోడ్స్లో దుల్కర్ తన స్క్రీన్ ప్రెజెన్స్తో ఆకట్టుకున్నారని ప్రేక్షకుల నుంచి టాక్ వినిపిస్తోంది.
మిస్కిన్, ఆంటోనీ వర్గీస్, కాయదు లోహర్ తమ పాత్రలకు న్యాయం చేశారు. జేక్స్ బిజోయ్ అందించిన బ్యాక్గ్రౌండ్ స్కోర్ యాక్షన్ సన్నివేశాలకు మరింత ఎనర్జీని తీసుకొచ్చింది. దుల్కర్ స్టైల్, మేనరిజమ్స్ ఆయన అభిమానులను ప్రత్యేకంగా ఆకట్టుకుంటున్నాయి.
సెకండాఫ్లో తగ్గిన వేగం
అయితే సినిమా రెండో భాగానికి వచ్చేసరికి కథనం కొంత నెమ్మదించినట్లు ప్రేక్షకులు అభిప్రాయపడుతున్నారు. బలహీనమైన డైలాగ్స్, ఎడిటింగ్లో కనిపించిన లోపాలు కథపై ప్రభావం చూపినట్లు తెలుస్తోంది. యాక్షన్ సన్నివేశాలు, దుల్కర్ పెర్ఫార్మెన్స్ ఫ్యాన్స్కు నచ్చినా.. సాధారణ ప్రేక్షకులను మాత్రం సినిమా పూర్తిస్థాయిలో మెప్పించలేకపోయిందనే అభిప్రాయాలు వ్యక్తమవుతున్నాయి.
తెలుగు షోలకు సాంకేతిక ఇబ్బందులు
ఇక తెలుగు వెర్షన్ విషయంలో తొలిరోజే సాంకేతిక సమస్యలు తలెత్తాయి. దీంతో మార్నింగ్, మ్యాట్నీ షోలు పలు ప్రాంతాల్లో రద్దయ్యాయి. సమస్యను పరిష్కరించి రాత్రి షోల నుంచి తెలుగు వెర్షన్ను ప్రదర్శించేందుకు మేకర్స్ ప్రయత్నాలు చేస్తున్నారు.
మొత్తంగా చూస్తే.. దుల్కర్ సల్మాన్ యాక్షన్, స్క్రీన్ ప్రెజెన్స్, ఫస్ట్ హాఫ్ సినిమాకు ప్రధాన బలంగా నిలవగా.. సెకండాఫ్లోని నెమ్మదైన కథనం ‘ఐ యామ్ గేమ్’కు మైనస్గా మారినట్లు తొలి స్పందనను బట్టి తెలుస్తోంది.
