సౌత్ సినీ ఇండస్ట్రీలో వరుస విజయాలతో తనకంటూ ప్రత్యేక గుర్తింపు తెచ్చుకున్న మలయాళ బ్యూటీ మమితా బైజు Mamitha Baiju ప్రస్తుతం సినిమాలతో బిజీగా ఉంది. మలయాళ చిత్రాలతో హీరోయిన్గా మంచి పేరు తెచ్చుకున్న ఆమె.. ఆ తర్వాత తమిళ సినిమాల్లోకి అడుగుపెట్టి అక్కడ కూడా వరుస అవకాశాలను అందుకుంటోంది. ‘సూపర్ శరణ్య’, ‘ప్రేమలు’ వంటి సినిమాలతో మమితకు భారీ క్రేజ్ వచ్చింది.
మలయాళంలో తొలుత సహాయ పాత్రల్లో కనిపించిన మమిత.. కథానాయికగా ఎదిగిన తర్వాత తన నటనతో ప్రేక్షకులను ఆకట్టుకుంది. జి.వి. ప్రకాష్ కుమార్ హీరోగా నటించిన ‘రెబల్’ సినిమాతో తమిళ చిత్రసీమలో హీరోయిన్గా ఎంట్రీ ఇచ్చింది. ఆ తర్వాత ‘డ్యూడ్’ సినిమాతో తమిళంలో మంచి విజయాన్ని అందుకుంది. దీంతో కోలీవుడ్లోనూ ఆమెకు మంచి డిమాండ్ ఏర్పడింది.
ఇదిలా ఉండగా.. తాజాగా మమితా బైజుకు సంబంధించిన ఓ వార్త సోషల్ మీడియాలో వైరల్గా మారింది. అధిక జ్వరం, ఒళ్లు నొప్పులతో బాధపడుతున్న ఆమె ప్రస్తుతం ఆసుపత్రిలో చికిత్స పొందుతున్నట్లు సమాచారం. అనారోగ్యం కారణంగా ఈ వారం ఆస్ట్రేలియాలో జరగాల్సిన ఓ మలయాళీ కార్యక్రమానికి హాజరు కావాల్సిన తన పర్యటనను కూడా ఆమె రద్దు చేసుకుంది.
ఈ విషయాన్ని మమిత స్వయంగా ఓ వీడియో ద్వారా వెల్లడించింది. తాను ప్రస్తుతం ఆసుపత్రిలో చికిత్స తీసుకుంటున్నానని, వైద్యులు పూర్తిగా విశ్రాంతి తీసుకోవాలని సూచించారని ఆమె తెలిపింది. ప్రయాణం చేయడం వల్ల శారీరక ఇబ్బందులు, అలర్జీలు మరింత పెరిగే అవకాశం ఉందని.. అందువల్ల ఎట్టి పరిస్థితుల్లోనూ ప్రయాణించవద్దని వైద్యులు సూచించినట్లు చెప్పింది.
తాను ఇచ్చిన మాట ప్రకారం కార్యక్రమానికి హాజరు కావాలని ఎంతో అనుకున్నప్పటికీ.. ప్రస్తుత పరిస్థితుల్లో తనకు మరో మార్గం లేకపోయిందని మమిత పేర్కొంది. ఆరోగ్యం సహకరించి ఉంటే తప్పకుండా ఆస్ట్రేలియాకు వచ్చేదాన్నని, అయితే వైద్యుల సూచన మేరకు విశ్రాంతి తీసుకోవాల్సి వస్తోందని వివరించింది.
మమితా బైజు అనారోగ్యానికి సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. అభిమానులు ఆమె త్వరగా కోలుకోవాలని ఆకాంక్షిస్తూ కామెంట్లు చేస్తున్నారు. ఇదిలా ఉండగా.. ఒకే ఏడాదిలో వరుస విజయాలు అందుకుంటూ దూసుకెళ్తున్న మమిత ప్రస్తుతం సౌత్లో క్రేజీ హీరోయిన్గా మారిందని అభిమానులు పేర్కొంటున్నారు.
