పాన్ ఇండియా స్టార్ ప్రభాస్ అభిమానులు ఎంతో ఆసక్తిగా ఎదురుచూస్తున్న సినిమాల్లో ‘ఫౌజీ’ Fauzi కూడా ఒకటి. ఈ చిత్రాన్ని డిసెంబర్ 3, 2026న ప్రేక్షకుల ముందుకు తీసుకురానున్నట్లు ఇప్పటికే మేకర్స్ ప్రకటించారు. అయితే అనుకున్న తేదీకి సినిమా థియేటర్లలోకి వస్తుందా? లేదా మరోసారి విడుదల వాయిదా పడుతుందా? అనే చర్చ ఇప్పుడు ఇండస్ట్రీ వర్గాల్లో జోరుగా సాగుతోంది.
‘ఫౌజీ’ షూటింగ్తో పాటు పోస్ట్ ప్రొడక్షన్ పనులు ఇంకా పూర్తికావాల్సి ఉండటమే ఈ సందేహాలకు ప్రధాన కారణంగా చెబుతున్నారు. ప్రభాస్ వరుసగా షూటింగ్లో పాల్గొంటూ తన బల్క్ డేట్స్ను కేటాయిస్తున్నారని, దీంతో పెండింగ్ పనులను వేగంగా పూర్తి చేసేందుకు చిత్రబృందం ప్రయత్నిస్తోందని సమాచారం. అయినప్పటికీ భారీ స్థాయిలో రూపొందుతున్న ఈ సినిమాకు అవసరమైన పనులన్నీ నిర్ణీత సమయానికి పూర్తవుతాయా అన్నదే ఇప్పుడు ప్రశ్నగా మారింది.
ఇక డిసెంబర్ రిలీజ్ రేసులోకి మరికొన్ని క్రేజీ సినిమాలు రావడం కూడా ‘ఫౌజీ’ విడుదలపై ఊహాగానాలకు కారణమవుతోంది. డిసెంబర్ 4న దుల్కర్ సల్మాన్ నటిస్తున్న ‘శ్రీశ్రీ’, విశ్వక్సేన్ మూవీ ‘లెగసీ’, నాగచైతన్య నటిస్తున్న ‘వృషకర్మ’ చిత్రాలు తమ విడుదల తేదీలను ఖరారు చేసుకున్నట్లు వార్తలు వస్తున్నాయి. సాధారణంగా ప్రభాస్ వంటి పాన్ ఇండియా స్టార్ సినిమా విడుదలకు ముందు ఇతర పెద్ద సినిమాలు అదే సమయంలో పోటీకి రావడానికి వెనుకాడుతుంటాయి. దీంతో ‘ఫౌజీ’ డిసెంబర్ 3 నుంచి తప్పుకునే అవకాశాలున్నాయనే ప్రచారం మరింత ఊపందుకుంది.
ఒకవేళ ‘ఫౌజీ’ డిసెంబర్ రేసు నుంచి తప్పుకుంటే తదుపరి విడుదల తేదీని ఖరారు చేయడం మేకర్స్కు అంత సులభం కాకపోవచ్చని ట్రేడ్ వర్గాలు అభిప్రాయపడుతున్నాయి. ఇప్పటికే సంక్రాంతి సీజన్కు పలు సినిమాలు తమ స్థానాలను దాదాపుగా ఫిక్స్ చేసుకున్నాయి. సంక్రాంతి తర్వాత పరీక్షల సీజన్ ప్రారంభం కానుండటంతో పెద్ద సినిమాకు అనువైన రిలీజ్ డేట్ కోసం మరికొంత కాలం వేచి చూడాల్సిన పరిస్థితి రావచ్చని అంటున్నారు.
అదే జరిగితే ‘ఫౌజీ’ విడుదల సమ్మర్ వరకు వెళ్లే అవకాశం ఉందనే చర్చ కూడా మొదలైంది. అయితే ప్రస్తుతం ఇవన్నీ కేవలం ఇండస్ట్రీలో జరుగుతున్న ఊహాగానాలు మాత్రమే. సినిమా విడుదల తేదీపై తుది నిర్ణయం మేకర్స్ చేతుల్లోనే ఉంది.
మరి ‘ఫౌజీ’ అనుకున్న డిసెంబర్ 3నే థియేటర్లలోకి వస్తుందా? లేక విడుదల తేదీని మార్చి కొత్త డేట్ ప్రకటిస్తారా? అనే దానిపై ప్రభాస్ అభిమానుల్లో ఉత్కంఠ నెలకొంది. ఈ రిలీజ్ అయోమయానికి చిత్రబృందం ఎప్పుడు తెరదించుతుందో చూడాలి.
