యూనివర్సల్ స్టార్ కమల్ హాసన్, స్టార్ డైరెక్టర్ శంకర్ కాంబినేషన్‌లో వచ్చిన ‘భారతీయుడు’ సినిమాకు ప్రత్యేకమైన స్థానం ఉంది. అప్పట్లో ఈ చిత్రం సంచలన విజయాన్ని అందుకోవడంతో పాటు శంకర్ దర్శకత్వ ప్రతిభకు మరోసారి బలమైన నిదర్శనంగా నిలిచింది. ఈ నేపథ్యంలో చాలా ఏళ్ల తర్వాత ‘భారతీయుడు 2’ను ప్రకటించడంతో సినిమాపై భారీ అంచనాలు ఏర్పడ్డాయి.
అయితే ‘భారతీయుడు 2’ విడుదలైన తర్వాత ప్రేక్షకుల నుంచి ఆశించిన స్థాయిలో స్పందన రాలేదు. సినిమా బాక్సాఫీస్ వద్ద నిరాశపరిచింది. దీంతో అప్పటికే ప్రకటించిన మూడో భాగం పరిస్థితి ఏంటనే ప్రశ్నలు మొదలయ్యాయి. ‘భారతీయుడు 3’ నేరుగా ఓటీటీలోకి వస్తుందనే ప్రచారం నుంచి, అసలు సినిమా విడుదల కాదనే రూమర్స్ వరకు సోషల్ మీడియాలో ఎన్నో వార్తలు వినిపించాయి.
తాజాగా ఈ సీక్వెల్ సిరీస్‌కు సంబంధించి మేకర్స్ నుంచి కీలకమైన అప్‌డేట్ వచ్చినట్లు తెలుస్తోంది. ‘ఇండియన్ 3’ ప్రాజెక్ట్ కొనసాగుతోందని, సినిమా నిర్మాణంలోనే ఉందని అధికారికంగా స్పష్టం చేసినట్లు సమాచారం. దీంతో మూడో భాగం విషయంలో ఇప్పటివరకు వినిపించిన అనేక ఊహాగానాలకు చెక్ పడినట్లైంది.
అంతేకాకుండా ‘భారతీయుడు 3’ Bharateeyudu 3 షూటింగ్‌లో ఎక్కువ భాగం ఇప్పటికే పూర్తయినట్లు తెలుస్తోంది. ఇంకా కొంత చిత్రీకరణతో పాటు విజువల్ ఎఫెక్ట్స్, పోస్ట్ ప్రొడక్షన్ పనులు పూర్తి చేయాల్సి ఉందని సమాచారం. అయితే మిగిలిన పనులను ఎప్పుడు పూర్తి చేస్తారు? సినిమా ఎప్పుడు థియేటర్లలోకి వస్తుంది? అనే విషయాలపై మాత్రం ఇంకా స్పష్టత రావాల్సి ఉంది.
‘భారతీయుడు 2’ ఫలితంతో నిరాశ చెందిన అభిమానులు ఇప్పుడు మూడో భాగంపై ప్రత్యేకంగా ఆశలు పెట్టుకున్నారు. ముఖ్యంగా అసలు కథలోని కీలక అంశాలను ‘భారతీయుడు 3’లో మరింత బలంగా చూపిస్తారనే ప్రచారం ఎప్పటి నుంచో ఉంది. అందుకే ఈ సినిమాతో శంకర్ మరోసారి తన మార్క్ చూపిస్తారా అనే ఆసక్తి పెరుగుతోంది.
అనిరుధ్ రవిచందర్ సంగీతం అందిస్తున్న ఈ చిత్రాన్ని లైకా ప్రొడక్షన్స్ నిర్మిస్తోంది. కమల్ హాసన్, శంకర్ కాంబినేషన్‌లో వస్తున్న ‘భారతీయుడు 3’ ఎప్పుడు విడుదలవుతుంది, మూడో భాగంతో దర్శకుడు ఎలాంటి ఫలితాన్ని అందుకుంటారు అనేది ఇప్పుడు ఆసక్తికరంగా మారింది.
