మాస్ మహారాజ రవితేజ హీరోగా, దర్శకుడు శివ నిర్వాణ తెరకెక్కించిన తాజా చిత్రం ‘ఇరుముడి’. ఎమోషనల్ డ్రామాగా రూపొందిన ఈ సినిమా ఫస్ట్ లుక్ నుంచే ప్రేక్షకుల్లో ఆసక్తిని పెంచింది. భారీ అంచనాలు, పాజిటివ్ బజ్ మధ్య థియేటర్లలోకి వచ్చిన ఈ మూవీ రవితేజ కెరీర్లోనే కాకుండా టాలీవుడ్లోనూ గుర్తుండిపోయే విజయంగా నిలిచింది.
‘ఇరుముడి’ విడుదలైన తర్వాత సినిమాకు సినీ ప్రముఖుల నుంచి ప్రశంసలు వెల్లువెత్తుతున్నాయి. ఇప్పటికే రామ్ చరణ్, రష్మిక మందన్న వంటి పలువురు సెలబ్రిటీలు సినిమాపై తమ అభిప్రాయాలను పంచుకోగా, తాజాగా మెగాస్టార్ చిరంజీవి కూడా తన స్పందనను తెలియజేశారు. ఆయన చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి.
తన ప్రియమైన తమ్ముడు రవితేజ ‘ఇరుముడి’తో భారీ బ్లాక్బస్టర్ అందుకోవడం ఎంతో సంతోషంగా ఉందని చిరంజీవి పేర్కొన్నారు. రవితేజకు హృదయపూర్వక శుభాకాంక్షలు తెలియజేస్తూ, సినిమాలోని త్రినాద్ పాత్రను తన భుజాలపై మోస్తూ అద్భుతమైన నటన కనబరిచావని ప్రశంసించారు.
సినిమాను మొదటి నుంచి చివరి వరకు ఎంతో ఎంజాయ్ చేశానని చిరంజీవి తెలిపారు. దర్శకుడు శివ నిర్వాణ ఇంత లోతైన కథాంశాన్ని అద్భుతంగా తెరకెక్కించారని కొనియాడారు. అలాగే సినిమాలో నటించిన బేబీ నక్షత్రకు ఉజ్వల భవిష్యత్తు ఉందని అభిప్రాయపడ్డారు.
అదే సమయంలో ‘ఇరుముడి’ చిత్రాన్ని నిర్మించిన మైత్రి మూవీ మేకర్స్ నిర్మాతలు రవి శంకర్, నవీన్ యెర్నేని సహా మొత్తం చిత్రబృందానికి మెగాస్టార్ శుభాకాంక్షలు తెలిపారు. సినిమా సాధించిన విజయంపై తన ఆనందాన్ని వ్యక్తం చేస్తూ యూనిట్ సభ్యులందరికీ బెస్ట్ విషెస్ అందించారు.
అయితే చిరంజీవి చేసిన చివరి వ్యాఖ్యలు మాత్రం ప్రత్యేకంగా నిలిచాయి. “ఒక సినిమా విజయం పరిశ్రమలోని అందరికీ పండుగే. ఈ పరిశ్రమ అందరిదీ… ఏ కొందరిదో కాదు. మనం బతకాలి… ఇతరులనూ బతికించాలి!” అంటూ ఆయన పేర్కొన్నారు.
ఈ వ్యాఖ్యలు ఇప్పుడు సినీ వర్గాల్లో చర్చనీయాంశంగా మారాయి. చిరంజీవి ఈ మాటలను ఏ ఉద్దేశంతో చెప్పారనే దానిపై సోషల్ మీడియాలో భిన్నమైన చర్చలు మొదలయ్యాయి. ఏదేమైనా రవితేజ సినిమాకు మెగాస్టార్ నుంచి ఇంతటి ప్రశంసలు రావడంతో అభిమానులు ఆనందం వ్యక్తం చేస్తున్నారు. ‘ఇరుముడి’ విజయానికి ఈ మెగాస్టార్ ఫీడ్బ్యాక్ మరింత ప్రత్యేకంగా మారింది.
