సూపర్ స్టార్ రజినీకాంత్ ప్రధాన పాత్రలో తెరకెక్కిన మోస్ట్ అవైటెడ్ సీక్వెల్ ‘జైలర్ 2’. దర్శకుడు నెల్సన్ దిలీప్‌కుమార్ రూపొందిస్తున్న ఈ యాక్షన్ ఎంటర్‌టైనర్‌పై దేశవ్యాప్తంగా భారీ అంచనాలు నెలకొన్నాయి. తొలి భాగం సాధించిన ఘన విజయానికి కొనసాగింపుగా వస్తున్న ఈ సినిమా ఇప్పుడు విడుదలకు సిద్ధమవుతోంది.పాన్ ఇండియా స్థాయిలో ప్రేక్షకుల ముందుకు వస్తున్న ‘జైలర్ 2’ ఇప్పటికే వివిధ భాషల్లో బిజినెస్ పరంగా ఆసక్తిని రేకెత్తిస్తోంది. ముఖ్యంగా హిందీ మార్కెట్‌లో ఈ సినిమాకు సంబంధించిన బిజినెస్, బ్రేక్ ఈవెన్ టార్గెట్‌పై తాజాగా ఇండస్ట్రీ వర్గాల్లో చర్చ జరుగుతోంది.
ట్రేడ్ వర్గాల సమాచారం ప్రకారం, హిందీలో ‘జైలర్ 2’కు సుమారు రూ.16 కోట్ల మేర బిజినెస్ జరిగినట్లు తెలుస్తోంది. ఈ లెక్కల ప్రకారం సినిమా అక్కడ బ్రేక్ ఈవెన్ సాధించాలంటే దాదాపు రూ.33 కోట్ల గ్రాస్ వసూళ్లు రాబట్టాల్సి ఉంటుందని సమాచారం.
రజినీకాంత్‌కు గతంలో హిందీ మార్కెట్‌లో మంచి క్రేజ్ ఉండేది. అయితే ఇటీవలి కాలంలో ఆయన సినిమాలకు ఉత్తరాది మార్కెట్‌లో గతంలో ఉన్న స్థాయిలో స్పందన కనిపించకపోవడం గమనార్హం. ఈ నేపథ్యంలో ‘జైలర్ 2’ Jailer 2 నార్త్ ఇండియాలో ఎలాంటి వసూళ్లు సాధిస్తుందనే అంశం ఆసక్తికరంగా మారింది.
అయితే తొలి ‘జైలర్’ సాధించిన విజయం, సీక్వెల్‌పై ఉన్న హైప్, రజినీకాంత్ మాస్ ఇమేజ్ సినిమాకు హిందీలో ఎంతవరకు ఉపయోగపడతాయో చూడాలి. కంటెంట్ ప్రేక్షకులను ఆకట్టుకుంటే ఈ టార్గెట్‌ను అందుకోవడం సాధ్యమేననే అభిప్రాయాలు కూడా వ్యక్తమవుతున్నాయి.
ఈ చిత్రానికి అనిరుధ్ రవిచందర్ సంగీతం అందిస్తుండగా, సన్ పిక్చర్స్ భారీ స్థాయిలో నిర్మిస్తోంది. రజినీకాంత్, నెల్సన్ కాంబినేషన్‌లో వస్తున్న ఈ సీక్వెల్ తమిళ మార్కెట్‌తో పాటు నార్త్‌లోనూ ఎలాంటి ప్రభావం చూపిస్తుందో విడుదల తర్వాతే స్పష్టమవుతుంది.
