మెగాస్టార్ చిరంజీవి హీరోగా బాబీ కొల్లి దర్శకత్వంలో తెరకెక్కుతున్న క్రేజీ ప్రాజెక్ట్ ‘కాకా’ Kaaka విడుదలపై కొంతకాలంగా సోషల్ మీడియాలో పలు వార్తలు వైరల్ అవుతున్నాయి. ఈ సినిమా వాయిదా పడే అవకాశం ఉందని, సంక్రాంతి సీజన్లో ‘కాకా’ స్థానంలో చిరంజీవి నటించిన మరో చిత్రం ‘విశ్వంభర’ ప్రేక్షకుల ముందుకు రావచ్చనే ప్రచారం జరిగింది. దీంతో అభిమానుల్లో కూడా రిలీజ్ విషయంలో కొంత అయోమయం నెలకొంది.
అయితే ఈ ఊహాగానాలకు చిత్ర నిర్మాణ సంస్థ కేవీఎన్ ప్రొడక్షన్స్ చెక్ పెట్టింది. ‘కాకా’ విడుదల తేదీలో ఎలాంటి మార్పు లేదని మేకర్స్ అధికారికంగా వెల్లడించారు. ఇప్పటికే ప్రకటించిన షెడ్యూల్ ప్రకారమే ఈ సినిమాను 2027 జనవరి 13న ప్రపంచవ్యాప్తంగా గ్రాండ్గా థియేటర్లలో విడుదల చేయనున్నట్లు స్పష్టం చేశారు.
దీంతో వచ్చే సంక్రాంతి సీజన్లో మెగాస్టార్ చిరంజీవి సందడి చేయడం ఖాయమైంది. రిలీజ్ డేట్పై వస్తున్న వార్తలకు నిర్మాతల ప్రకటనతో ఫుల్స్టాప్ పడటంతో అభిమానులు కూడా ఊపిరి పీల్చుకున్నారు. మరోవైపు, కేవీఎన్ ప్రొడక్షన్స్ తెలుగు చిత్ర పరిశ్రమలో అడుగుపెడుతున్న తొలి భారీ ప్రాజెక్ట్ కావడంతో ‘కాకా’పై ఇండస్ట్రీ వర్గాల్లో ఆసక్తి నెలకొంది.
సినిమా విడుదల తేదీని మరోసారి కన్ఫర్మ్ చేసిన మేకర్స్, ప్రమోషన్స్ను కూడా వేగవంతం చేయబోతున్నారు. ఇందులో భాగంగా త్వరలోనే చిత్రంలోని ఫస్ట్ సింగిల్ను ప్రేక్షకుల ముందుకు తీసుకురానున్నట్లు ప్రకటించారు. దీంతో సినిమాపై ఉన్న అంచనాలను మరింత పెంచేలా ప్రమోషనల్ కార్యక్రమాలకు శ్రీకారం చుట్టినట్లు తెలుస్తోంది.
మొత్తానికి ‘కాకా’ సంక్రాంతి రేసు నుంచి తప్పుకోవడం లేదని నిర్మాతల క్లారిటీతో స్పష్టమైంది. జనవరి 13న మెగాస్టార్ బాక్సాఫీస్ వద్ద ఎలాంటి సందడి చేస్తారనేది ఇప్పుడు ఆసక్తికరంగా మారింది.
