సూపర్ స్టార్ మహేష్ బాబు Mahesh Babu ప్రస్తుతం తన కెరీర్‌లో అత్యంత ప్రతిష్టాత్మకమైన ప్రాజెక్ట్ ‘వారణాసి’తో బిజీగా ఉన్నారు. గ్లోబల్ స్థాయిలో ప్రేక్షకులకు పరిచయం కానున్న ఈ సినిమాపై భారీ అంచనాలు నెలకొన్న నేపథ్యంలో, మహేష్ తదుపరి ప్రాజెక్టులపై కూడా ఆసక్తి పెరుగుతోంది.
ఈ క్రమంలో ఆయన లైనప్‌కు సంబంధించి తాజాగా ఓ ఆసక్తికరమైన రూమర్ సోషల్ మీడియాలో చక్కర్లు కొడుతోంది. కోలీవుడ్ స్టార్ డైరెక్టర్ లోకేష్ కనగరాజ్ దర్శకత్వంలో మహేష్ బాబు ఓ సినిమా చేయబోతున్నారనే ప్రచారం మరోసారి తెరపైకి వచ్చింది.
గతంలో లోకేష్ కనగరాజ్, అల్లు అర్జున్ కాంబినేషన్‌లో అనౌన్స్ అయిన ప్రాజెక్ట్‌ను మహేష్ బాబుతో తెరకెక్కించనున్నారనే వార్తలు వినిపించాయి. అయితే ఆ ప్రచారంలో వాస్తవం లేదని అప్పట్లో స్పష్టత వచ్చింది. తాజాగా వినిపిస్తున్న సమాచారం మాత్రం ఆ ప్రాజెక్ట్‌కు సంబంధం లేనిదిగా తెలుస్తోంది.
తాజా బజ్ ప్రకారం, లోకేష్ కనగరాజ్ ప్రత్యేకంగా మహేష్ బాబు కోసం ఓ కొత్త కథను సిద్ధం చేస్తున్నారట. ప్రస్తుతం ఈ ప్రాజెక్ట్ కేవలం చర్చల దశలోనే ఉందని, కథ పూర్తిగా సిద్ధమైన తర్వాత మహేష్‌కు నేరేషన్ ఇవ్వనున్నారని టాక్ వినిపిస్తోంది.
అన్నీ అనుకున్నట్లు జరిగితే మహేష్ బాబు ప్రస్తుత ప్రాజెక్ట్ పూర్తయిన తర్వాత లోకేష్ కనగరాజ్‌తో సినిమా చేసే అవకాశం ఉండొచ్చనే ఊహాగానాలు మొదలయ్యాయి. అయితే ఈ కాంబినేషన్‌పై ఇప్పటివరకు ఎలాంటి అధికారిక ప్రకటన రాలేదు.
మహేష్ బాబు స్టార్ ఇమేజ్‌కు లోకేష్ మార్క్ యాక్షన్, యూనివర్స్ కాన్సెప్ట్ కలిస్తే సినిమా ఏ స్థాయిలో ఉంటుందనే ఆసక్తి అభిమానుల్లో సహజంగానే మొదలైంది. ఈ రూమర్ నిజమై ప్రాజెక్ట్ పట్టాలెక్కితే మాత్రం మహేష్ అభిమానులకు ఇది నిజంగానే భారీ ట్రీట్ అవుతుంది.
