శ్రీవిష్ణు హీరోగా నటించిన ‘కామ్రేడ్ కళ్యాణ్’ Comrade Kalyan ఇప్పుడు థియేటర్లలో సందడి చేసేందుకు సిద్ధమవుతోంది. భారీ అంచనాల మధ్య రావాల్సిన ‘ఆదర్శ కుటుంబం’ స్థానంలో ఈ చిన్న సినిమా విడుదల కానుండటం చిత్రబృందానికి మంచి అవకాశంగా మారింది. అదే సమయంలో ఈ అనూహ్యమైన రిలీజ్ స్లాట్ సినిమాపై ప్రేక్షకుల దృష్టిని మరింత పెంచుతోంది.
‘కామ్రేడ్’ అనే టైటిల్ వినగానే సీరియస్ పొలిటికల్ డ్రామా తరహా సినిమా అనిపించినప్పటికీ, టీజర్‌, ట్రైలర్ మాత్రం పూర్తి భిన్నమైన టోన్‌ను చూపించాయి. కామెడీ, ఎంటర్‌టైన్‌మెంట్‌కు పెద్దపీట వేస్తూ విడుదలైన ప్రమోషనల్ కంటెంట్‌కు మంచి స్పందన రావడంతో సినిమాపై అంచనాలు కూడా పెరిగాయి.
కొత్త దర్శకుడు జానకిరామ్ మారెళ్ల తెరకెక్కించిన ఈ చిత్రాన్ని అవుట్ అండ్ అవుట్ ఎంటర్‌టైనర్‌గా మేకర్స్ ప్రమోట్ చేస్తున్నారు. ఇప్పటికే ఏర్పడిన బజ్‌తో ఈ సినిమా శుక్రవారం ప్రేక్షకుల ముందుకు రానుంది.
అయితే సినిమాకు సంబంధించిన ఓ అంశం మాత్రం ఆసక్తిని రేకెత్తిస్తోంది. నక్సలిజం నేపథ్యాన్ని టచ్ చేసే పీరియడ్ కథలో కామెడీని ప్రధానంగా నడిపించడం అంత సులభమైన విషయం కాదు. ఇలాంటి సున్నితమైన నేపథ్యాన్ని వినోదాత్మకంగా చూపించేటప్పుడు కథలోని సీరియస్ ఎలిమెంట్స్‌కు, కామెడీకి మధ్య సరైన బ్యాలెన్స్ ఉండాల్సి ఉంటుంది.
‘కామ్రేడ్ కళ్యాణ్’ విషయంలో దర్శకుడు ఈ అంశాన్ని ఏ విధంగా హ్యాండిల్ చేశారనేది ఇప్పుడు కీలకంగా మారింది. ట్రైలర్‌లో కనిపించిన ఫన్ సినిమా అంతటా కొనసాగుతుందా? సీరియస్ నేపథ్యాన్ని ప్రేక్షకులకు ఇబ్బంది కలగకుండా ఎంటర్‌టైనింగ్‌గా చెప్పగలిగారా? అనేది థియేటర్లలో సినిమా చూసిన తర్వాతే తేలనుంది.
మొత్తానికి మంచి బజ్‌తో విడుదలకు సిద్ధమైన ‘కామ్రేడ్ కళ్యాణ్’కు ప్రస్తుత రిలీజ్ స్లాట్ కలిసొచ్చే అవకాశాలు కనిపిస్తున్నాయి. అయితే విభిన్నమైన నేపథ్యాన్ని కామెడీతో మేళవించిన ఈ ప్రయత్నం ప్రేక్షకులను ఎంతవరకు మెప్పిస్తుందో చూడాలి.
