కేసు నిమిత్తం పోలీస్ స్టేషన్‌కు వెళ్లిన మహిళను ఎస్ఐ లొంగదీసుకుని, గర్భవతిని చేశాడు. అనంతరం ఆమెకు బలవంతంగా అబార్షన్ చేయించిన ఘటన తమిళనాడులోని కన్యాకుమారి జిల్లాలో వెలుగులోకి వచ్చింది. బాధిత మహిళ కోర్టును ఆశ్రయించడంతో అతడిపై కేసు నమోదుచేయాలని ఆదేశాలు జారీచేసింది. దీంతో మహిళా పోలీస్ స్టేషన్‌లో అతడిపై లైంగిక వేధింపుల కేసు నమోదుచేశారు. పోలీసులు తెలిపిన వివరాల ప్రకారం.. కన్యాకుమారి జిల్లా కళియకొవిల్ పోలీసు స్టేషన్ పరిధిలోని ఓ ప్రాంతానికి చెందిన మహిళకు పెళ్లై 9 ఏళ్ల కుమార్తె ఉంది.
భర్తతో విడాకులు తీసుకున్న ఆమె.. కుమార్తెను హాస్టల్‌లో చేర్పించి ఒంటరిగా ఉంటోంది. ఈ క్రమంలో అదే ప్రాంతంలో ఉండే ఓ యువకుడు ఆమెను ప్రేమిస్తున్నానని, పెళ్లిచేసుకుంటానని నమ్మించాడు. అవసరం తీరిపోయాకా అతడు మోసం చేయడంతో యువకుడిపై ఫిర్యాదు చేయటానికి పళుగల్ పోలీసు స్టేషన్‌కు వెళ్లింది. దీంతో అతడిపై కేసు నమోదుచేసిన అక్కడ ఎస్ఐ.. ఆమెకు న్యాయం చేస్తామని హామీ ఇచ్చాడు. ఈ క్రమంలో ఎస్ఐ ఆమెతో లైంగిక సంబంధం పెట్టుకుని గర్భవతిని చేశాడు.
గర్భం దాల్చిన విషయం ఆయనకు చెప్పడంతో అబార్షన్ చేయించుకోమని చెప్పాడు. అందుకు ఆమె నిరాకరించడంతో బలవంతంగా ఓ పోలీస్, మహిళా డాక్టర్ సహా స్నేహితుల సాయంతో అబార్షన్ చేయించాడని బాధితురాలు ఫిర్యాదు చేసింది. అప్పటి నుంచి తాను చాలా నీరసించిపోయానని తెలిపింది. ఈ విషయమైన పలు పోలీస్ స్టేషన్‌లలో ఫిర్యాదు చేయడానికి వెళ్లినా పట్టించుకోలేదని ఆరోపించింది. చివరకు కోర్టును ఆశ్రయించినట్టు వివరించింది.
బాధితురాలి పిటిషన్‌పై స్పందించిన కోర్టు.. సదరు ఎస్ఐపై ఎఫ్‌ఐఆర్ నమోదుచేయాలని ఆదేశించింది. ఈ ఘటనపై కేసు నమోదుచేసిన మహిళా పోలీసులు.. విచారణ చేపట్టగా ఎస్ఐ ప్రమోషన్ మీద థేని జిల్లాలో పనిచేస్తున్నట్టు తేలింది. ఎస్ఐ, అతడికి సహకరించిన ఏడుగురిపై కేసు నమోదుచేసినట్టు తెలిపారు.