మెగాస్టార్ చిరంజీవి వెండితెరపై తనకంటూ ప్రత్యేకమైన గుర్తింపు సంపాదించుకున్నారు. దశాబ్దాలుగా ప్రేక్షకులను అలరిస్తున్న ఆయన డిజిటల్ ఎంట్రీ కోసం అభిమానులు చాలాకాలంగా ఎదురుచూస్తున్నారు. ఈ క్రమంలో ప్రముఖ ఓటీటీ సంస్థ నెట్‌ఫ్లిక్స్‌లో ‘మెగావర్స్’ అనే టాక్ షోతో చిరంజీవి ప్రేక్షకుల ముందుకు రాబోతున్నారనే వార్త ఆసక్తిని పెంచుతోంది.
ఇప్పటికే పలు ఎపిసోడ్స్ షూటింగ్?
‘మెగావర్స్’ను Megaverse ఒక క్రేజీ టాక్ షోగా రూపొందిస్తున్నట్లు సమాచారం. ఇప్పటికే ఈ షోకు సంబంధించిన పలు ఎపిసోడ్స్ షూటింగ్ కూడా పూర్తయినట్లు ప్రచారం జరుగుతోంది. దీంతో చిరంజీవి ఓటీటీ ఎంట్రీ ఎలా ఉండబోతుంది? ఈ షోలో ఎలాంటి ఆసక్తికరమైన సంభాషణలు చోటుచేసుకోనున్నాయి? అనే ప్రశ్నలు అభిమానుల్లో ఆసక్తిని పెంచుతున్నాయి.
డిసెంబర్ రెండో వారంలో స్ట్రీమింగ్?
ఈ షో తొలి ఎపిసోడ్ ఎప్పుడు స్ట్రీమింగ్‌కు వస్తుందనే విషయంపై గత కొంతకాలంగా చర్చ జరుగుతోంది. తొలుత దీపావళి సందర్భంగా మొదటి ఎపిసోడ్‌ను విడుదల చేయాలని భావించినట్లు వార్తలు వచ్చాయి. అయితే తాజా ప్రచారం ప్రకారం ‘మెగావర్స్’ తొలి ఎపిసోడ్‌ను డిసెంబర్ రెండో వారాంతంలో స్ట్రీమింగ్‌కు తీసుకురావాలని ప్లాన్ చేస్తున్నారట.
అయితే దీనిపై నెట్‌ఫ్లిక్స్ లేదా షో నిర్వాహకుల నుంచి అధికారిక ప్రకటన రావాల్సి ఉంది. చిరంజీవి డిజిటల్ ఎంట్రీతో ‘మెగావర్స్’ ఎలాంటి సందడి సృష్టిస్తుందో చూడాలి.
