ఇన్‌స్టాగ్రామ్‌ తన ఫ్లాట్‌ఫామ్‌లో వరుసగా కొత్త ఫీచర్లను తీసుకొస్తోంది. యూజర్లకు మరింత సదుపాయంగా ఉండేలా, మరింత ఆకర్షణీయంగా తీర్చిదిద్దుతోంది. తాజాగా ఇన్‌స్టాగ్రామ్‌ తన షార్ట్ వీడియో ఫ్లాట్‌ఫామ్‌ రీల్స్ లో కొత్తగా రెండు ఫీచర్లను తీసుకొచ్చింది. రెండు ఆడియో టూల్స్ అందుబాటులోకి తెచ్చింది. అవే.. టెక్ట్స్ టూ స్పీచ్, వాయిస్ ఎఫెక్ట్స్‌. మరింత క్రియేటివ్‌గా రీల్స్‌లో వీడియోలు చేసేందుకు ఈ రెండు టూల్స్ ఉపయోగపడనున్నాయి. కాగా ఈ రెండు ఫీచర్లు టిక్‌టిక్‌ లో ఉన్న వాటిని పోలి ఉన్నాయి.
వీడియోలకు తమ గొంతు కాకుండా ఆర్టిఫిషియల్ వాయిస్ ఉండాలనుకునే వారికి ఈ టెక్ట్స్ టూ స్పీచ్ చాలా ఉపయోగపడుతుంది. వీడియోలో ఏం మాటలు ఉండాలో టైప్ చేస్తే ఈ టూల్ ఆ టెక్ట్స్ ను స్పీచ్ లోకి మార్చి వీడియోకు యాడ్ చేస్తుంది. ఈ టెక్ట్స్ టూ స్పీచ్ ఆప్షన్ ను ఎలా వాడాలంటే..
ముందుగా ఇన్‌స్టాగ్రామ్‌లో రీల్స్ కెమెరాను ఓపెన్ చేయాలి. ఆ తర్వాత వీడియోను రికార్డు చేయడమో లేదా గ్యాలరీ యాప్‌లో ఉన్న వీడియోను అప్ లోడ చేయాలి.
ఆ తర్వాత టెక్ట్స్ టూల్‌ను ఉపయోగించి టెక్ట్స్ టైప్ చేయాలి. ఆ తర్వాత టెక్ట్స్ పై క్లిక్ చేస్తే ఓ బబుల్ వస్తుంది. అక్కడ వచ్చే త్రీడాటెడ్ మెనూలో టెక్ట్స్ టూ స్పీచ్ ఆప్షన్ సెలెక్ట్ చేసుకోవాలి.అప్పుడు యూజర్లకు రెండు ఆప్షన్లు కనిపిస్తాయి. వాయిస్ 1, వాయిస్ 2 అని ఆప్షన్లు వస్తాయి. దాంట్లో ఏదో ఒక ఆప్షన్ ను సెలెక్ట్ చేసుకుంటే మీరు టైప్ చేసిన టెక్ట్స్ వాయిస్‌గా మారి వీడియోకు జత అవుతుంది.
వీడియోకు ఉన్న వాయిస్ ఓవర్ లేదా ఆడియోలో మార్పులు చేయాలంటే ఈ వాయిస్ ఎఫెక్ట్స్‌ను వినియోగించవచ్చు. ఆడియో విభిన్నంగా ఉండేందుకు కూడా ఈ టూల్ వినియోగించవచ్చు. ప్రస్తుతం ఐదు వాయిస్ ఎఫెక్టులను ఇన్‌స్టాగ్రామ్‌ అందిస్తోంది. అనౌన్సర్, హీలియమ్, జైంట్, రోబోట్, వోకలిస్ట్ అనే ఎఫెక్టులు ఉన్నాయి.
వాయిస్ ఎఫెక్ట్స్‌ వాడాలంటే.. ముందుగా రీల్ లో ఓ వీడియోను రికార్డు చేసి మ్యూజిక్ నోట్ ఆప్షన్ ఓపెన్ చేయాలి. అక్కడ ఎఫెక్ట్స్‌ మెనూ కనిపిస్తుంది. ఆ తర్వాత వాయిస్ ఎఫెక్ట్స్‌ ఆప్షన్ ఎంపిక చేసుకొని ఇన్‌స్టాగ్రామ్‌ రీల్‌కు కావాల్సిన ఎఫెక్టును జతచేయవచ్చు. ఆండ్రాయిడ్, ఐఓఎస్ ఫ్లాట్‌ఫామ్‌లకు ఈ ఫీచర్లు అందుబాటులో ఉన్నాయి.