యంగ్‌ రెబల్‌ స్టార్‌ ప్రభాస్‌ హీరోగా ప్రస్తుతం ‘సాహో’ చిత్రం తెరకెక్కుతున్న విషయం తెల్సిందే. ‘బాహుబలి’ చిత్రం తర్వాత ప్రభాస్‌ క్రేజ్‌ అమాంతం పెరిగి పోయింది. సుజీత్‌ దర్శకత్వంలో ‘సాహో’ చిత్రం షూటింగ్‌ చివరి దశకు చేరుకుంది. ఈ సమయంలోనే మరో సినిమాకు సంబంధించిన షూటింగ్‌లో ప్రభాస్‌ పాల్గొంటున్నాడు. ‘సాహో’ తర్వాత ప్రభాస్‌ రాధాకృష్ణ దర్శకత్వంలో తెరకెక్కబోతున్న ఒక లవ్‌ స్టోరీ చిత్రంతో ప్రేక్షకుల ముందుకు రాబోతున్నాడు. ఆ చిత్రంకు సంబంధించిన చిత్రీకరణ తాజాగా ప్రారంభం అయ్యింది. ఇటీవలే అధికారికంగా ప్రకటించిన ప్రభాస్‌ తాజాగా చిత్రం షూటింగ్‌ కోసం ఇటలీ వెళ్లాడు.
‘జిల్‌’ దర్శకుడు రాధాకృష్ణ దర్శకత్వంలో రూపొందబోతున్న ఈ చిత్రం 50 ఏళ్ల క్రితం నేపథ్యంలో ఉండబోతుంది. ఇటలీ బ్యాక్‌ డ్రాప్‌లో ఈ చిత్రం ఉంటుందని సమాచారం అందుతుంది. భారీ ఎత్తున అంచనాలున్న ఈ చిత్రంలో ఎక్కువ శాతం షూటింగ్‌ను ఇటలీలో నిర్వహించబోతున్నారు. అందుకోసం ఇటలీకి చిత్ర యూనిట్‌ సభ్యులు వెళ్లారు. తాజాగా ఈ చిత్రం లుక్‌ కూడా రివీల్‌ అయ్యింది. ఈ లుక్‌లో ప్రభాస్‌ చాలా లావుగా ఉన్నట్లుగా అనిపిస్తుంది. కొత్త గెటప్‌ తో పాటు విభిన్నమైన మేకోవర్‌తో ప్రభాస్‌ కనిపించబోతున్నాడు. మొత్తానికి ప్రభాస్‌ కొత్త సినిమాలో లుక్‌ చాలా విభిన్నంగా ఉండబోతుంది.
