ఇండియన్ సినిమా పరిధి రోజురోజుకూ మరింత విస్తరిస్తోంది. ముఖ్యంగా భారీ బడ్జెట్ చిత్రాలు ఇప్పుడు కేవలం దేశీయ మార్కెట్‌ను మాత్రమే కాకుండా అంతర్జాతీయ ప్రేక్షకులను కూడా దృష్టిలో పెట్టుకుని తెరకెక్కుతున్నాయి. ఈ క్రమంలో పలు సినిమాలు హాలీవుడ్ సంస్థలతో భాగస్వామ్యాలు కుదుర్చుకుంటూ గ్లోబల్ మార్కెట్‌పై ఫోకస్ పెడుతున్నాయి.
కన్నడ రాకింగ్ స్టార్ యష్ నటిస్తున్న ‘టాక్సిక్’ కూడా ఇదే తరహాలో భారీ స్థాయిలో రూపొందుతోంది. ఈ సినిమాను కన్నడతో పాటు ఇంగ్లీష్‌లోనూ తెరకెక్కిస్తున్నట్లు ఇప్పటికే వార్తలు వచ్చాయి. అంతేకాకుండా హాలీవుడ్‌కు చెందిన ప్రముఖ సంస్థ లయన్స్‌గేట్‌తో ఈ ప్రాజెక్ట్ అనుబంధం ఏర్పరచుకోవడం సినిమాపై మరింత ఆసక్తిని పెంచింది.
ఇక యష్ నిర్మాణ భాగస్వామిగా ఉన్న మరో ప్రతిష్టాత్మక ప్రాజెక్ట్ ‘రామాయణ’ కూడా అంతర్జాతీయ స్థాయిలో రూపొందుతోంది. ఈ సినిమాకు సంబంధించి సోనీ ఇంటర్నేషనల్ పిక్చర్స్‌తో భాగస్వామ్యం ఏర్పడినట్లు సమాచారం.
ఇప్పుడు ఇదే తరహాలో ఐకాన్ స్టార్ అల్లు అర్జున్ నటిస్తున్న ‘రాకా’ Raaka కూడా గ్లోబల్ స్కేల్‌లో ముందుకు వెళ్లేందుకు సిద్ధమవుతోందనే టాక్ వినిపిస్తోంది. ఈ సినిమాకు ఓ ప్రముఖ అంతర్జాతీయ సంస్థతో కీలకమైన కొలాబరేషన్ ఉండబోతోందని సినీ వర్గాల్లో చర్చ జరుగుతోంది.
అయితే ఈ భాగస్వామ్యం కేవలం అంతర్జాతీయ డిస్ట్రిబ్యూషన్‌కు సంబంధించినదా? లేక సినిమాలో హాలీవుడ్‌కు చెందిన నటీనటులు కూడా భాగం కానున్నారా? అనే విషయంపై ఇంకా స్పష్టత రావాల్సి ఉంది.
ముఖ్యంగా హాలీవుడ్ స్టార్ విల్ స్మిత్ ‘రాకా’లో కనిపించనున్నారనే ప్రచారం గత కొంతకాలంగా సోషల్ మీడియాలో వినిపిస్తోంది. అయితే ఈ వార్తపై ఇప్పటివరకు ఎలాంటి అధికారిక ధృవీకరణ లేదు.
మరి ‘రాకా’ నిజంగానే అంతర్జాతీయ స్థాయి భాగస్వామ్యంతో తెరకెక్కనుందా? విల్ స్మిత్ ఎంట్రీపై వస్తున్న వార్తల్లో నిజమెంత? అనే విషయాలకు అధికారిక ప్రకటన వచ్చే వరకు వేచి చూడాల్సిందే.
