నాని హీరోగా శ్రీకాంత్ ఓదెల దర్శకత్వంలో తెరకెక్కుతున్న ‘ది ప్యారడైజ్’ సినిమాపై ప్రేక్షకుల్లో ఇప్పటికే మంచి అంచనాలు ఉన్నాయి. ప్రస్తుతం సినిమా ప్రమోషన్స్ను చిత్రబృందం జోరుగా నిర్వహిస్తోంది. ఇందులో భాగంగా దర్శకుడు శ్రీకాంత్ ఓదెల, విలన్ పాత్రలో నటిస్తున్న రాఘవ్ జుయల్తో కలిసి ఓ ఇంటర్వ్యూలో పాల్గొని తన కెరీర్కు సంబంధించిన పలు ఆసక్తికర విషయాలను వెల్లడించారు.
ఈ సందర్భంగా రామ్ చరణ్ Ram Charan తనకు ఇచ్చిన ప్రత్యేకమైన గిఫ్ట్ గురించి శ్రీకాంత్ ఓదెల చెప్పుకొచ్చారు. ‘రంగస్థలం’ సినిమా సమయంలో ఆయన సుకుమార్ వద్ద కాస్ట్యూమ్ డిపార్ట్మెంట్లో అసిస్టెంట్ డైరెక్టర్గా పనిచేశారు. ఆ సినిమా షూటింగ్ చివరి రోజున రామ్ చరణ్ తనకు ఓ ప్రత్యేకమైన లాకెట్ను బహుమతిగా ఇచ్చారని శ్రీకాంత్ తెలిపారు.
ఈ లాకెట్ను చెన్నైలో మెగాస్టార్ చిరంజీవి స్వయంగా డిజైన్ చేయించారట. చరణ్ తనకు ఆ లక్కీ లాకెట్ను ఇచ్చినప్పటి నుంచి ఇప్పటివరకు దానిని ఒక్కసారి కూడా తీయలేదని శ్రీకాంత్ ఓదెల వెల్లడించారు. తనకు ఎంతో ప్రత్యేకమైన జ్ఞాపకంగా భావిస్తూ దానిని ఎప్పటికీ తన దగ్గరే ఉంచుకున్నట్లు చెప్పారు.
అయితే ఇటీవల రామ్ చరణ్ను కలిసిన సమయంలో ఈ లాకెట్ గురించి శ్రీకాంత్ ప్రస్తావించగా, చరణ్ మాత్రం ఆ విషయాన్ని పూర్తిగా మర్చిపోయారని తెలిసి తాను ఆశ్చర్యపోయినట్లు దర్శకుడు తెలిపారు. తనకు మాత్రం ఈ గిఫ్ట్ ఇప్పటికీ ఎంతో ప్రత్యేకమైనదని ఆయన చెప్పుకొచ్చారు.
ప్రస్తుతం ‘ది ప్యారడైజ్’ సినిమాను ప్రతిష్టాత్మకంగా తెరకెక్కించేందుకు శ్రీకాంత్ ఓదెల రేయింబవళ్లు శ్రమిస్తున్నారు. ప్రమోషన్స్లో భాగంగా ఆయన చెప్పిన ఈ ఆసక్తికరమైన వ్యక్తిగత జ్ఞాపకం ప్రస్తుతం సోషల్ మీడియాలో వైరల్గా మారింది. రామ్ చరణ్తో శ్రీకాంత్ ఓదెలకు ఉన్న ఈ ప్రత్యేక అనుబంధం గురించి తెలుసుకున్న మెగా అభిమానులు కూడా ఆసక్తిగా స్పందిస్తున్నారు.
