Posted [relativedate] at [relativetime time_format=”H:i”]
టాలీవుడ్ ను డ్రగ్స్ రాకెట్ ఉక్కిరి బిక్కిరి చేస్తున్న టైంలో హీరో రానాకు విదేశాల నుంచి ఓ పార్శిల్ రావటం కలకలం సృష్టించింది. ఆ పార్శిల్ లో డ్రగ్స్ ఉన్నాయంటూ సోషల్ మీడియాలో వార్తలొచ్చాయి. దీనిపై దగ్గుబాటి సురేష్ బాబు వివరణ కూడా ఇచ్చారు. తన కొడుకు వెన్నునొప్పితో బాధపడుతున్నాడని, అది తగ్గించుకోటానికి విదేశాల నుంచిe ఓ పరికరాన్ని తెప్పించుకున్నామని, ఆ పార్శిల్ లో డ్రగ్స్ లాంటివి ఏవీ లేవని స్పష్టంచేశారు. అటు ఎక్సైజ్ అధికారులూ తనఖీలు చేసి డ్రగ్స్ లేవని నిర్ధారించారు. తాజాగా రానా కూడా దీనిపై స్పందించారు.
విదేశాల నుంచి తనకు వచ్చిన పార్శిల్ బాక్స్ ఇమేజ్ ను ట్విట్టర్ లో ఉంచారు. దీనిపై ఇంకా ఎవరికన్నా సందేహాలుంటే ఈ ఫొటోతో అవి తొలగిపోతాయని ట్విట్టర్ లో రానా పేర్కొన్నాడు. టాలీవుడ్ డ్రగ్స్ కేసుకు, ఈ పార్శిల్ కు ముడిపెట్టి వార్తలు రాయొద్దని మీడియాకు విజ్ఞప్తి చేశాడు రానా. తన నేనే రాజు నేనే మంత్రి సినిమా రిలీజ్ కు సిద్దంగా ఉందని, ఓ టీవీ షోతో పాటు కబడ్డీ, బాక్సింగ్ సీజన్స్ కు కూడా తాను బ్రాండ్ అంబాసిడర్గా ఉన్నానని, వాటి గురించి మాత్రమే వార్తలు రాయాలని కోరాడు.
రానా పెట్టిన ఫొటోతో పార్శిల్ సందేహాలు తొలగిపోయినప్పటికీ….ఆయన చెప్పినట్టుగానే సినిమా వార్తలు, కార్యక్రమ విశేషాలు మాత్రమే రాసేసి సోషల్ మీడియా, మెయిన్ స్ట్రీమ్ మీడియా ఊరుకుంటుందా…? డ్రగ్స్ కేసు ముగిసేదాకా ప్రత్యక్షంగానో, పరోక్షంగానో రానా పేరు వినిపిస్తూనే ఉంటుంది. ఇదిలా ఉంటే రానా ట్విట్టర్ లో పెట్టిన పార్శిల్ ఇమేజ్ పై ఆయన మొబైల్ నెంబర్ ఉంది. ఈ నెంబర్ ను ఇప్పుడు సోషల్ మీడియాలో అందరూ షేర్ చేసుకుంటున్నారు.