నాచురల్ స్టార్ నాని హీరోగా, కయాదు లోహర్ కథానాయికగా నటిస్తున్న భారీ చిత్రం ‘ది ప్యారడైజ్’ The Paradise. ‘దసరా’ ఫేమ్ శ్రీకాంత్ ఓదెల దర్శకత్వంలో తెరకెక్కుతున్న ఈ సినిమాపై ఇప్పటికే భారీ అంచనాలు నెలకొన్నాయి. నాని, శ్రీకాంత్ ఓదెల కాంబినేషన్లో మరోసారి వస్తున్న ఈ మూవీ కోసం అభిమానులు ఆసక్తిగా ఎదురుచూస్తున్నారు.
ఇప్పటికే ‘ది ప్యారడైజ్’ నుంచి విడుదలైన తొలి పాట ప్రేక్షకులను విపరీతంగా ఆకట్టుకుంది. కాసర్ల శ్యామ్ అందించిన పవర్ఫుల్ లిరిక్స్కు అనిరుధ్ రవిచందర్ తన మాస్ బీట్స్తో అదిరిపోయే టచ్ ఇచ్చారు. దీంతో ఈ సాంగ్కు మంచి రెస్పాన్స్ రావడంతో పాటు సోషల్ మీడియాలో కూడా హల్చల్ చేసింది.
ఇక ఇప్పుడు ఇదే కాంబినేషన్లో మరో పాట రాబోతున్నట్లు మేకర్స్ అధికారికంగా ప్రకటించారు. తాజాగా కాసర్ల శ్యామ్, అనిరుధ్ కలిసి ఉన్న ఫోటోను దర్శకుడు శ్రీకాంత్ ఓదెల షేర్ చేశారు. ఈ ఫోటోలో అనిరుధ్ కాసర్ల శ్యామ్కు నమస్కరిస్తుండగా, శ్యామ్ ఆయనను ఆశీర్వదిస్తున్నట్టుగా కనిపించారు.
ఈ ఫోటోను శ్రీకాంత్ ఓదెల తన కెమెరాలో బంధించడంతో పాటు, రెండో పాటకు సంబంధించిన రికార్డింగ్ పూర్తయిన విషయాన్ని కూడా వెల్లడించారు. త్వరలోనే ఈ సాంగ్ను ప్రేక్షకుల ముందుకు తీసుకురాబోతున్నట్లు మేకర్స్ తెలిపారు.
మొదటి పాటకు వచ్చిన రెస్పాన్స్ను దృష్టిలో పెట్టుకుంటే, అనిరుధ్, కాసర్ల శ్యామ్ కాంబినేషన్లో వస్తున్న ఈ రెండో సాంగ్పై కూడా ఆసక్తి నెలకొంది. మరి ఈసారి వీరి కలయిక ఎలాంటి మ్యాడ్ నెంబర్ను అందిస్తుందో చూడాలి.
ఎస్ఎల్వీ సినిమాస్ బ్యానర్పై తెరకెక్కుతున్న ‘ది ప్యారడైజ్’ను సెప్టెంబర్ 25న గ్రాండ్గా థియేటర్లలో విడుదల చేసేందుకు మేకర్స్ సన్నాహాలు చేస్తున్నారు. నాని, శ్రీకాంత్ ఓదెల కాంబినేషన్లో వస్తున్న ఈ చిత్రం బాక్సాఫీస్ వద్ద ఎలాంటి సంచలనం సృష్టిస్తుందో చూడాలి.
