రెబల్ స్టార్ ప్రభాస్ హీరోగా, మారుతి దర్శకత్వంలో తెరకెక్కిన ‘The RajaSaab’ బాక్సాఫీస్ వద్ద ఆశించిన విజయాన్ని అందుకోలేకపోయిన సంగతి తెలిసిందే. ఈ సినిమా ఫలితంపై తాజాగా క్రియేటివ్ ప్రొడ్యూసర్ SKN స్పందిస్తూ భావోద్వేగ వ్యాఖ్యలు చేశారు.
‘చెన్నై లవ్ స్టోరీ’ ప్రమోషన్స్లో భాగంగా ఇచ్చిన ఓ ఇంటర్వ్యూలో SKN మాట్లాడుతూ, ‘The RajaSaab’ తనకు కేవలం ఓ సినిమా మాత్రమే కాదని, దానితో తనకు వ్యక్తిగత అనుబంధం కూడా ఉందన్నారు. ప్రభాస్, దర్శకుడు మారుతితో ఉన్న సాన్నిహిత్యం కారణంగా సినిమా ఆశించిన ఫలితం సాధించకపోవడం తనను తీవ్రంగా బాధించిందని చెప్పారు.
“The RajaSaab ఆడి ఉంటే చాలా బాగుండేది. ఆ సినిమా ఫలితం వల్ల మారుతి కంటే నేనే ఎక్కువ బాధపడ్డాను” అని SKN పేర్కొన్నారు. అయితే, ఒక సినిమా ఫలితాన్ని బయటివారు సులభంగా విశ్లేషించడం సరికాదని ఆయన అభిప్రాయపడ్డారు.
ఒక సినిమా కోసం వందలాది మంది ఎంతో కష్టపడతారని, ఫలితం ఆశించినట్లు రాకపోయినా వారి శ్రమను తక్కువ చేసి చూడకూడదని SKN అన్నారు. ప్రస్తుతం ఆయన చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి.
