గత సినిమాల ఫలితాల్ని దృష్టిలో పెట్టుకొని సినిమాలకు కొంత విరామం తీసుకున్న మంచు విష్ణు మళ్లీ స్పీడు పెంచుతున్నారు. మూడు సినిమాలు చేయబోతున్నారు. ఇందులో ఒకటి హాలీవుడ్ సినిమా కావడం గమనార్హం. వీటితో పాటు ఏపీ రాజకీయాల ఆధారంగా ఓ వెబ్‌సిరీస్‌ను నిర్మిస్తున్నారు. రెండు కొత్త చిత్రాలతో పాటు వెబ్‌సిరీస్‌ను ఆదివారం హైదరాబాద్‌లో ప్రారంభించారు. విష్ణు, కాజల్ అగర్వాల్ జంటగా ఐటీ రంగ నేపథ్యంలో యథార్థ ఘటనల ఆధారంగా ఓ యాక్షన్ డ్రామా సినిమా రూపొందనున్నది. 2800 కోట్ల రూపాయల దోపిడీ ఎలా జరిగిందనే పాయింట్‌తో జాతీయ అంతర్జాతీయ సాంకేతిక నిపుణుల కలయికలో ఈ చిత్రం రూపుదిద్దుకోనున్నది.
ఈ చిత్రానికి సంబంధించిన పూర్తి వివరాల్ని త్వరలోనే వెల్లడించనున్నారు. అలాగే సుబ్బరాజు అనే నూతన దర్శకుడితో ఓ న్యూ ఏజ్ థ్రిల్లర్ సినిమా నిర్మించనున్నారు విష్ణు. ఈ చిత్రానికి మిరా రోడ్ అనే టైటిల్‌ను ఖరారు చేశారు. నిజజీవిత సంఘటనలతో రూపొందనున్న ఈ చిత్రం ఈ ఏడాది చివరలో విడుదలకానుంది. అలాగే విష్ణు హాలీవుడ్‌లో అరంగేట్రం చేయబోతున్నారు. జెఫ్రెచిన్ దర్శకత్వంలో రూపొందుతున్న ఈ ఆంగ్ల చిత్రంలో కాజల్ అగర్వాల్ కథానాయికగా నటిస్తున్నది. వాస్తవిక అంశాల స్ఫూర్తితో తెరకెక్కుతున్న ఈ చిత్రానికి విష్ణు సతీమణి విరానికా నిర్మాతగా వ్యవహరించనున్నారు. వయామార్, ఏవీఏ ఎంటర్‌టైన్‌మెంట్, 24 ఫ్రేమ్స్ ఫ్యాక్టరీ సంస్థలు నిర్మిస్తున్నారు. ప్రముఖ హాలీవుడ్ నటుడు కీలక పాత్రలో నటిస్తున్న ఈ సినిమా చిత్రీకరణ ప్రస్తుతం జరుగుతున్నది. దీంతో పాటు పొలిటికల్ డ్రామా వెబ్‌సిరీస్‌ను నిర్మిస్తున్నారు విష్ణు.
