కొల్లాజెన్ ప్రొడక్షన్, ఎముకలు బలంగా ఉండాలన్నా, గాయాలు నయం చేయాలన్నా, రక్తనాళాలు సరిగ్గా పనిచేయాలన్నా విటమిన్ సి చాలా ముఖ్యమైనది. అందువల్ల శరీరంలో తగినంత మోతాదులో విటమిన్ సి లేకపోతే అనేక వ్యాధుల బారిన పడే అవకాశముంటుంది. ఈ వ్యాధులు మరిన్ని సమస్యలకు గురిచేయవచ్చు.
మన శరీరానికి అవసరమైన పోషకాల్లో విటమిన్ సి ప్రధానమైనది. ఆరోగ్యాన్ని కాపాడుకోవడంలోనే కాదు చర్మ సంరక్షణలో కూడా ఇది ముఖ్య పాత్ర పోషిస్తుంది. విటమిన్ సి యాంటీ ఆక్సిడెంట్గా పనిచేస్తూ చర్మ సంరక్షణలో కీలకంగా పనిచేస్తుంది. ప్రతిరోజూ విటమిన్ సి ఉండే ఆహారాన్ని మహిళలు 75 మిల్లీ గ్రాములు తీసుకోవాలి. అదే పురుషులు అయితే 90 మిల్లీ గ్రాములను తీసుకోవాలి.
ఈ క్వాంటిటీ కంటే తక్కువ తీసుకుంటే విటమిన్ సి లోపం వస్తుంది. శరీరంలో విటమిన్ సి లోపం ఉండకూడదంటే నేచురల్ ఫుడ్స్, డైటరీ సప్లిమెంట్ తీసుకోవాలి. విటమిన్ సి లోపం వల్ల వచ్చే సమస్యలను నివారించడానికి తగిన ఆహారాలను రెగ్యులర్‌గా తీసుకోవాలి.
విటమిన్స్ సి లోపం వల్ల అలసట, దంతక్షయం, జాయిట్ పెయిన్ ఎక్కువగా వస్తుంటాయి. అంతే కాదు విటమిన్ సి లోపం వల్ల మరికొన్ని వ్యాధులు కూడా వచ్చే అవకాశాలున్నాయి. విటమిన్ సి లోపం వల్ల వచ్చే మరికొన్ని సమస్యలు..
స్కర్వి అనేది విటమిన్ సి లోపంతో ముడిపడి ఉన్న అత్యంత ముఖ్యమైన వ్యాధి. ఆహారంలో విటమిన్ సి లోపం వల్ల ఈ వ్యాధి సంభవిస్తుంది. ఇది గాయాలు, చిగుళ్ళ నుండి రక్తస్రావం, బలహీనత, అలసట, దద్దుర్లు వంటి వాటికి దారితీస్తుంది. మరోవైపు, అలసట, ఆకలి తగ్గడం, చిరాకు, కీళ్ల నొప్పులకు కారణమవుతుంది. సకాలంలో చికిత్స చేయకపోతే, ఇది రక్తహీనత, చిగురువాపు, చర్మపు రక్తస్రావం మొదలైన వాటికి కూడా దారితీస్తుంది.
చర్మ ఆరోగ్యాన్ని కాపాడడంలో విటమిన్ సి ముఖ్యపాత్ర పోషిస్తుంది. విటమిన్ సి యాంటీఆక్సిడెంట్ లక్షణాలను కలిగి ఉంటుంది. ఇది కొల్లాజెన్ ఉత్పత్తిలో కీలక పాత్ర పోషిస్తుంది. విటమిన్ సి లోపం వల్ల మీ చర్మం, జుట్టు, కీళ్ల ఆరోగ్యం దెబ్బతింటుంది. ఇది మీ చర్మంపై గాయాలు, మచ్చలకు దారితీస్తుంది.
థైరాయిడ్ గ్రంథి అధిక హార్మోన్లను స్రవించడాన్ని హైపర్ థైరాయిడిజం అంటారు. మీ థైరాయిడ్ ఆరోగ్యానికి విటమిన్ సి చాలా కీలకం. విటమిన్ సి లోపం వల్ల థైరాయిడ్ గ్రంథుల నుండి హార్మోన్లు అధికంగా స్రవించి, హైపర్ థైరాయిడిజానికి దారితీస్తుంది. తద్వారా అనుకోకుండా బరువు తగ్గడం, గుండె దడ, ఆకలి పెరగడం, భయపడటం, వణుకు, మహిళల్లో రుతుక్రమంలో మార్పులు వంటివి సమస్యలు వస్తాయి.
విటమిన్ సి లోపం వల్ల ఎనీమియా లేదా రక్తహీనత వ్యాధి వచ్చే అవకాశం ఉంది. అందుకే ఆహారంలో విటమిన్ సి చేర్చడం చాలా ముఖ్యం. మీ శరీరంలో ఎర్ర రక్త కణాల సంఖ్య తగ్గినా లేదా నాణ్యత తగ్గినా ఎనీమియాగా గుర్తించాలి. దీని వల్ల అలసట, పాలిపోవడం, శ్వాస ఆడకపోవడం, మైకం, బరువు తగ్గడం వంటి సమస్యలు వస్తాయి.
దంతాలు ఆరోగ్యంగా ఉండాలంటే విటమిన్ సి చాలా అవసరం. ఇది మీ దంతాలను బలోపేతం చేయడమే కాకుండా, చిగుళ్లను కూడా కాపాడుతుంది. అందువల్ల, విటమిన్ సి లోపం మీ చిగుళ్లు రక్తస్రావం, చిగుళ్ల వ్యాధికి దారితీస్తుందని గుర్తించుకోవాలి.
విటమిన్ సి లోపం ద్వారా వచ్చే వ్యాధులకు చెక్ పెట్టేందుకు మీ రోజువారీ ఆహారంలో విటమిన్ సి అధికంగా ఉండే పదార్థాలను చేర్చండి. సిట్రస్ పండ్లు, విటమిన్ సి అధికంగా ఉండే కూరగాయలు ఎక్కువగా తీసుకోవాలి. ధూమపానం చేసేవారి శరీరంలో విటమిన్ సి తగ్గుతుందని అధ్యయనాల్లో తేలింది. అందువల్ల ధూమపానం చేసే అలవాటు ఉంటే తక్షణమే మానేయండి.