నటసింహం నందమూరి బాలకృష్ణ (Balakrishna) – దర్శకుడు కొరటాల శివ కాంబినేషన్లో రూపొందనున్న సినిమా ఇప్పటికే భారీ అంచనాలు పెంచుకుంటోంది. తాజాగా ఈ ప్రాజెక్ట్కు సంబంధించి ఒక ఆసక్తికర అప్డేట్ ఇండస్ట్రీలో చక్కర్లు కొడుతోంది.
సినిమా సెకండ్ హాఫ్లో వచ్చే కీలక ఫ్లాష్బ్యాక్ ఎపిసోడ్ కోసం బాలయ్య పూర్తిగా కొత్త లుక్లో దర్శనమివ్వనున్నారట. ఈ ప్రత్యేకమైన మేకోవర్ కోసం ప్రముఖ సెలబ్రిటీ హెయిర్ స్టైలిస్ట్ ఆలిమ్ హాకిమ్ బాలకృష్ణకు కొత్త హెయిర్ స్టైల్ను డిజైన్ చేస్తున్నారని సమాచారం. హెయిర్ స్టైల్ మాత్రమే కాదు, డ్రెస్సింగ్ స్టైల్ కూడా పూర్తిగా మార్చి, బాలయ్యను అల్ట్రా స్టైలిష్గా చూపించబోతున్నారట మేకర్స్.
ఇక షూటింగ్ విషయానికి వస్తే, ఆగస్టు నెలలో సినిమా సెట్స్పైకి వెళ్లే అవకాశాలు కనిపిస్తున్నాయి. తొలి షెడ్యూల్ను భారీ యాక్షన్ సీక్వెన్స్తో ప్రారంభించాలనే ప్లాన్లో ఉన్నారట. మొత్తం మీద ఈ చిత్రంలో బాలయ్యను పవర్ఫుల్ మాస్ అవతార్లో చూపించేందుకు కొరటాల శివ గట్టి స్కెచ్ వేసినట్లు టాక్.
మాస్ ఎలిమెంట్స్తో పాటు ఫ్యామిలీ ఎమోషన్స్ కూడా ఈ సినిమాలో కీలకంగా ఉండనున్నాయని తెలుస్తోంది. కథ కూడా ఇప్పటివరకు చూడని విధంగా ప్రత్యేకంగా ఉండబోతుందట. దేవర తర్వాత కొరటాల శివ తెరకెక్కిస్తున్న సినిమా కావడంతో, కథపై ఆయన ప్రత్యేకంగా కసరత్తులు చేశారనే ప్రచారం ఉంది.
ఈ చిత్రాన్ని సుధాకర్ చెరుకూరి మరియు సుధాకర్ మిక్కిలినేని సంయుక్తంగా నిర్మిస్తున్నారు. మొత్తానికి బాలయ్య కొత్త లుక్, కొరటాల మార్క్ కథనంతో ఈ సినిమా అభిమానులకు ఓ పక్కా ట్రీట్ ఇవ్వనుందనే అంచనాలు బలంగా వినిపిస్తున్నాయి.