ఒకప్పుడు మాస్ సినిమాలకు కేరాఫ్ అడ్రస్గా నిలిచిన హీరో గోపీచంద్ ప్రస్తుతం కాస్త సైలెంట్గా కనిపిస్తున్నారు. ‘యజ్ఞం’ వంటి చిత్రాలతో మాస్ ఆడియన్స్లో తనకంటూ ప్రత్యేకమైన ఇమేజ్ను సొంతం చేసుకున్న ఆయన.. కొంతకాలంగా వరుస పరాజయాలను ఎదుర్కొంటున్నారు. దీంతో ఆయన మార్కెట్ కూడా గతంతో పోలిస్తే కొంత తగ్గినట్లు కనిపిస్తోంది.
గోపీచంద్ చివరిగా నటించిన ‘పక్కా కమర్షియల్’, ‘విశ్వం’ చిత్రాలు ప్రేక్షకుల అంచనాలను అందుకోలేకపోయాయి. ఈ సినిమాల తర్వాత ఆయన నుంచి మరో సినిమా ప్రేక్షకుల ముందుకు రాలేదు. దీంతో గోపీచంద్ వెండితెరపై కనిపించి ఇప్పటికే రెండేళ్లకు పైగా సమయం కావడంతో అభిమానుల్లో ఆసక్తి పెరుగుతోంది.
ప్రస్తుతం గోపీచంద్ చేతిలో ‘భరతవర్ష’, ‘సింగ’ అనే రెండు ప్రాజెక్టులు ఉన్నాయి. అయితే ఈ సినిమాల విషయంలోనూ ఆశించినంత వేగం కనిపించడం లేదని తెలుస్తోంది. నిర్మాణ వ్యయం, ఓటీటీ మార్కెట్లో నెలకొన్న పరిస్థితులు వంటి కారణాలతో ఈ చిత్రాల విడుదల ఆలస్యమవుతున్నట్లు టాక్ వినిపిస్తోంది.
ఇక ‘భరతవర్ష’ సినిమాపై మాత్రం గోపీచంద్ అభిమానులు భారీ అంచనాలు పెట్టుకున్నారు. ‘ఘాజీ’ ఫేమ్ సంకల్ప్ రెడ్డి ఈ చిత్రానికి దర్శకత్వం వహిస్తున్నారు. ఏడో శతాబ్దం నాటి నేపథ్యాన్ని ఆధారంగా చేసుకుని తెరకెక్కుతున్న ఈ సినిమా కథ, విజువల్స్ ప్రేక్షకులకు సరికొత్త అనుభూతిని అందించేలా ఉంటాయని తెలుస్తోంది.
చాలాకాలం తర్వాత గోపీచంద్ నుంచి ఒక పీరియాడిక్ యాక్షన్ ఎంటర్టైనర్ రాబోతుండటంతో ఈ సినిమాపైనే అభిమానుల దృష్టి ఎక్కువగా ఉంది. సరైన మాస్ ఎలిమెంట్స్తో పాటు బలమైన కథ, భారీ యాక్షన్ సన్నివేశాలు సినిమాలో వర్కౌట్ అయితే గోపీచంద్కు ఈ చిత్రం మంచి కమ్బ్యాక్గా నిలిచే అవకాశం ఉందని అభిమానులు భావిస్తున్నారు.
ప్రస్తుతం గోపీచంద్కు కావాల్సింది కూడా ఒక బలమైన విజయం. మంచి కంటెంట్తో సినిమా ప్రేక్షకుల ముందుకు వస్తే ఆయన బాక్సాఫీస్ మార్కెట్ తిరిగి పుంజుకునే అవకాశం ఉంది. అందుకే ‘భరతవర్ష’ BharataVarsha ప్రమోషన్స్ను వీలైనంత త్వరగా మొదలుపెట్టి, విడుదల తేదీపై స్పష్టత ఇస్తే అభిమానుల్లో మరింత ఆసక్తి పెరుగుతుందని టాక్.
ఇక ‘భరతవర్ష’తో గోపీచంద్ ఎలాంటి కమ్బ్యాక్ ఇస్తాడనేది ఆసక్తికరంగా మారింది. ఇప్పటివరకు సైలెంట్గా ఉన్న ఈ యాక్షన్ హీరో.. ఈసారి గట్టిగా బౌన్స్ బ్యాక్ అవుతాడా? అనేది తెలియాలంటే సినిమా విడుదల వరకు వేచి చూడాల్సిందే.
