టాలీవుడ్ మెగాస్టార్ చిరంజీవి (Chiranjeevi), కోలీవుడ్ సూపర్ స్టార్ రజినీకాంత్ (Rajinikanth) సినిమాలు బాక్సాఫీస్ వద్ద ఎదురెదురుగా విడుదలైతే ఆ క్రేజ్ మామూలుగా ఉండదు. గతంలో ‘భోళా శంకర్’, ‘జైలర్’ చిత్రాల సమయంలో పోటీ పడిన ఈ ఇద్దరు లెజెండ్స్.. ఇప్పుడు మరోసారి దసరా, సంక్రాంతి రేసుల్లో తలపడే అవకాశాలు కనిపిస్తున్నాయి.
ఇప్పటికే రజినీకాంత్ నటిస్తున్న ‘జైలర్ 2’ అక్టోబర్ 15న ప్రేక్షకుల ముందుకు రానున్నట్లు అధికారికంగా ప్రకటించారు. మరోవైపు, పలుమార్లు వాయిదా పడిన చిరంజీవి ‘విశ్వంభర’ చిత్రాన్ని అక్టోబర్ 16న దసరా కానుకగా విడుదల చేసేందుకు మేకర్స్ ప్లాన్ చేస్తున్నట్లు సమాచారం. అయితే ఈ విడుదల తేదీపై అధికారిక స్పష్టత రావాల్సి ఉంది. చిరంజీవి పుట్టినరోజు సందర్భంగా ఆగస్టు 22న దీనిపై క్లారిటీ వచ్చే అవకాశం ఉందని టాక్.
ఇక దసరా పోటీతోనే ఈ ఇద్దరి బాక్సాఫీస్ క్లాష్ ముగిసేలా కనిపించడం లేదు. 2027 సంక్రాంతి రేసులోనూ చిరంజీవి, రజినీకాంత్ సినిమాలు పోటీ పడే అవకాశాలు ఉన్నట్లు సినీ వర్గాల్లో చర్చ జరుగుతోంది.
కమల్ హాసన్ నిర్మాణంలో రజినీకాంత్ నటిస్తున్న ‘ధర్మన్’ చిత్రాన్ని పొంగల్ సందర్భంగా విడుదల చేసేందుకు సన్నాహాలు జరుగుతున్నట్లు సమాచారం. అదే సమయంలో బాబీ కొల్లి దర్శకత్వంలో చిరంజీవి నటిస్తున్న ‘మెగా158’ను కూడా సంక్రాంతి బరిలో దింపేందుకు మేకర్స్ ప్లాన్ చేస్తున్నట్లు తెలుస్తోంది.
అయితే పెద్ద సినిమాల విషయంలో విడుదల తేదీలు చివరి నిమిషంలో మారడం సాధారణమే. దీంతో ప్రస్తుతం వినిపిస్తున్న ఈ రెండు క్లాష్లు నిజంగా బాక్సాఫీస్ వద్ద జరుగుతాయా? లేక విడుదల తేదీల మార్పులతో పోటీ తప్పుతుందా? అనేది అధికారిక ప్రకటనలు వచ్చే వరకు ఆసక్తికరంగానే ఉండనుంది.
