గోపీచంద్ హీరోగా నటించిన తాజా చిత్రం ‘చాణక్య’. మెహ్రీన్ హీరోయిన్. తిరు దర్శకత్వం వహించారు. స్పై థ్రిల్లర్‌గా తెరకెక్కిన ఈ చిత్రం అక్టోబర్ 5న ప్రేక్షకుల ముందుకు వస్తోంది. ఈ చిత్రం గురువారం సెన్సార్ కార్యక్రమాలు పూర్తిచేసుకుంది. సెన్సార్ బోర్డు ఈ చిత్రానికి యు/ఎ సర్టిఫికెట్ ఇచ్చింది.
కాగా, ‘చాణక్య’ సినిమాను చూసిన సెన్సార్ సభ్యులు పాజిటివ్‌గా స్పందించినట్టు ఇండస్ట్రీ వర్గాల ద్వారా తెలిసింది. ఇండో-పాక్ నేపథ్యంలో సాగే ఈ స్పై థ్రిల్లర్ ప్రేక్షకులను ఆకట్టుకునేలా ఉందని చిత్ర దర్శక, నిర్మాతలకు సెన్సార్ సభ్యులు చెప్పారట. సినిమా హిట్టు అవుతుందని భరోసా ఇచ్చారట. చాలా కాలంగా హిట్టు కోసం పరితపిస్తోన్న గోపీచంద్‌కు ‘చాణక్య’ ఊరటనివ్వడం ఖాయమని అంటున్నారు.
చిత్ర నిర్మాత కూడా ఇదే ధీమాతో ఉన్నారట. అందుకే, ‘సైరా’ లాంటి పెద్ద సినిమా ఉన్నా అక్టోబర్ 5న విడుదల చేసే ధైర్యం చేస్తున్నారు. నిజానికి సెన్సార్ టాక్‌పై అనిల్ సుంకర ఒక ట్వీట్ చేశారు. సెన్సార్ బోర్డు సభ్యులంతా ‘చాణక్య’ను మెచ్చుకున్నారని, ముఖ్యంగా డైలాగులు చాలా బాగున్నాయని ప్రశంసించారని అనిల్ తన ట్వీట్‌లో పేర్కొన్నారు. ఈ ప్రశంసలు అందుకోవడానికి మాటల రచయిత అబ్బూరి రవి అర్హుడని అన్నారు. విలన్ డైలాగ్ వీడియోను కూడా ట్వీట్‌లో పొందుపరిచారు.
ఇదిలా ఉంటే, బాలీవుడ్ నటి జరీన్ ఖాన్ ‘చాణక్య’లో ఒక కీలక పాత్రలో నటించారు. దక్షిణాదిలో జరీన్ నటించిన తొలి చిత్రం ఇదే. ఈ చిత్రంలో విశాల్ చంద్రశేఖర్ పాటలు స్వరపరిచారు. శ్రీచరణ్ పాకాల రెండు పాటలతో పాటు బ్యాక్‌గ్రౌండ్ స్కోరు కూడా అందించారు. వెట్రి సినిమాటోగ్రాఫర్. అబ్బూరి రవి మాటలు రాశారు. ఎ.కె.ఎంటర్‌టైన్మెంట్స్ బ్యానర్‌పై అనిల్ సుంకర ఈ చిత్రాన్ని నిర్మించారు.