హైదరాబాద్ లోని ఆర్టీసీ బస్సులో ఈరోజు తుపాకీ కాల్పులు జరిగాయి. దీంతో ప్రయాణికులంతా ఒక్కసారిగా భయాందోళనకు లోనయ్యారు. ఈరోజు పంజాగుట్ట చౌరస్తా నుంచి కొండాపూర్ వైపు వెళ్తున్న 47 ఎల్‌ ఆర్టీసీ బస్సులో సఫారి సూట్ వేసుకున్న ఓ వ్యక్తి ఎక్కాడు. ఈ సందర్భంగా ఫుట్ బోర్డుపై నిలుచున్న అతడిని కిందకు దిగాలని డ్రైవర్ కోరగా, దిననని మొండికేశాడు. ఈ సందర్భంగా ప్రయాణికులతో వాగ్వాదం చెలరేగడంతో ఒక్కసారిగా తుపాకీ తీసి గాల్లోకి కాల్పులు జరిపాడు. ఈ ఘటనలో బుల్లెట్ బస్సు రూఫ్ టాప్ పైనుంచి దూసుకెళ్లింది. కాగా, ఈ ఘటనపై ఇటు బస్సు డ్రైవర్, అటు కాల్పులు జరిపిన వ్యక్తి ఎవ్వరూ ఫిర్యాదు చేయలేదు. ఈ నేపథ్యంలో కాల్పులు జరిపిన వ్యక్తి కోసం పోలీసులు గాలిస్తున్నారు.