కన్నడ స్టార్ హీరో, అభినయ చక్రవర్తి కిచ్చా సుదీప్ Kiccha Sudeep పుట్టినరోజు సందర్భంగా అభిమానులకు అదిరిపోయే సర్ప్రైజ్ అందింది. ఇప్పటివరకు విభిన్న పాత్రలతో ప్రేక్షకులను ఆకట్టుకున్న సుదీప్.. త్వరలోనే చారిత్రక పాత్రలో కనిపించబోతున్నాడు. విజయనగర సామ్రాజ్యాన్ని ఘనంగా పాలించిన మహారాజు శ్రీకృష్ణదేవరాయల పాత్రను ఆయన పోషించనున్నట్లు మేకర్స్ అధికారికంగా ప్రకటించారు.
ఈ ప్రతిష్టాత్మక ప్రాజెక్ట్కు ‘దేవరాయ’ అనే ఆసక్తికరమైన టైటిల్ను ఖరారు చేశారు. పాన్-ఇండియా స్థాయిలో భారీ బడ్జెట్తో రూపొందనున్న ఈ సినిమాను పీపుల్ మీడియా ఫ్యాక్టరీ, సుప్రియ్యాన్వి పిక్చర్స్ సంయుక్తంగా నిర్మిస్తున్నాయి. ఈ పీరియాడికల్ చిత్రానికి గౌర హరి సంగీతాన్ని సమకూరుస్తున్నారు.
విజయనగర సామ్రాజ్య వైభవం, శ్రీకృష్ణదేవరాయల పాలన, ఆ కాలం నాటి చారిత్రక నేపథ్యాన్ని తెరపై ఆవిష్కరించేలా ఈ సినిమాను భారీ స్థాయిలో తెరకెక్కించనున్నట్లు తెలుస్తోంది. 2027 డిసెంబర్లో ఈ విజువల్ వండర్ను ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ వెల్లడించారు.
మహారాజు శ్రీకృష్ణదేవరాయల వంటి శక్తివంతమైన చారిత్రక పాత్రలో సుదీప్ నటించనుండటంతో ‘దేవరాయ’పై ఇప్పటి నుంచే భారీ అంచనాలు ఏర్పడ్డాయి. సుదీప్ లుక్, పాత్రను ఆయన ఎలా ఆవిష్కరించబోతున్నారనే అంశాలపై అభిమానుల్లో ఆసక్తి నెలకొంది.
అయితే ఈ సినిమాకు దర్శకత్వం వహించనున్న దర్శకుడి పేరును మాత్రం మేకర్స్ ప్రస్తుతానికి వెల్లడించలేదు. త్వరలోనే ఈ ప్రాజెక్ట్కు సంబంధించిన మరిన్ని వివరాలను ప్రకటించే అవకాశం ఉంది.