సూపర్స్టార్ రజినీకాంత్ అభిమానులు ఎంతో ఆసక్తిగా ఎదురుచూస్తున్న మోస్ట్ అవైటెడ్ పాన్ ఇండియా చిత్రం ‘జైలర్ 2’ Jailer 2. నెల్సన్ దిలీప్కుమార్ దర్శకత్వంలో తెరకెక్కుతున్న ఈ మూవీపై ఇప్పటికే భారీ అంచనాలు నెలకొన్నాయి. అయితే కొంతకాలంగా సినిమా నుంచి పెద్దగా ప్రమోషనల్ అప్డేట్స్ లేకపోవడంతో విడుదల తేదీపై పలు రకాల ఊహాగానాలు సోషల్ మీడియాలో చక్కర్లు కొట్టాయి.
‘జైలర్ 2’ అనుకున్న సమయానికి థియేటర్లలోకి రాకపోవచ్చంటూ ఇటీవల ప్రచారం ఊపందుకుంది. దీంతో ఈ సినిమా విడుదల వాయిదా పడుతుందా? అనే సందేహాలు అభిమానుల్లో మొదలయ్యాయి. తాజాగా ఈ ప్రచారానికి చిత్రబృందం ఫుల్స్టాప్ పెట్టింది.
ముందుగా ప్రకటించిన రిలీజ్ డేట్లో ఎలాంటి మార్పు లేదని మేకర్స్ అధికారికంగా వెల్లడించారు. అక్టోబర్ 15, 2026న ‘జైలర్ 2’ ప్రపంచవ్యాప్తంగా గ్రాండ్గా ప్రేక్షకుల ముందుకు రానుందని స్పష్టం చేశారు. ఈ విషయాన్ని తెలియజేస్తూ కొత్త పోస్టర్ను కూడా విడుదల చేశారు. దీంతో రిలీజ్పై నెలకొన్న కన్ఫ్యూజన్కు తెరపడింది.
ఇక సినిమా ప్రమోషన్స్ను కూడా త్వరలో మరింత జోరుగా నిర్వహించేందుకు మేకర్స్ సిద్ధమవుతున్నట్లు తెలుస్తోంది. ఇప్పటికే విడుదలైన ‘అలా బొలేలో’ పాటకు ప్రేక్షకుల నుంచి మంచి స్పందన లభించింది. రానున్న రోజుల్లో మూవీకి సంబంధించిన మరిన్ని అప్డేట్స్, ప్రమోషనల్ కంటెంట్ విడుదల చేసే అవకాశం ఉంది.
ఈ చిత్రంలో రజినీకాంత్తో పాటు శివరాజ్కుమార్, మోహన్లాల్, ఎస్.జె. సూర్య, హృతిక్ రోషన్, రమ్యకృష్ణ తదితరులు కీలక పాత్రల్లో కనిపించనున్నారు. సన్ పిక్చర్స్ భారీ స్థాయిలో నిర్మిస్తున్న ఈ సినిమాకు అనిరుధ్ రవిచందర్ సంగీతం అందిస్తున్నాడు.
రిలీజ్ డేట్పై క్లారిటీ రావడంతో ‘జైలర్ 2’ కోసం ఎదురుచూస్తున్న అభిమానుల్లో మరింత జోష్ నెలకొంది. అక్టోబర్ 15న థియేటర్లలో రజినీకాంత్ మాస్ ట్రీట్ ఎలా ఉండబోతుందో చూడాలంటే అప్పటివరకు వేచి చూడాల్సిందే.
