టాలీవుడ్‌లో తనదైన కామెడీ, థ్రిల్లర్ సినిమాలతో ప్రత్యేక గుర్తింపు తెచ్చుకున్న దర్శకుడు రవిబాబు మరో ఆసక్తికరమైన ప్రాజెక్ట్‌తో ప్రేక్షకుల ముందుకు రాబోతున్నారు. ‘అల్లరి’, ‘నువ్విలా’, ‘నచ్చావులే’ వంటి ఎంటర్‌టైనింగ్ సినిమాలతో పాటు ‘అమరావతి’, ‘అవును’, ‘అనసూయ’ వంటి థ్రిల్లర్లతో తనకంటూ ప్రత్యేకమైన మేకింగ్ స్టైల్‌ను ఏర్పరుచుకున్నారు.
కంగనా రనౌత్‌తో హారర్ థ్రిల్లర్!
ఈ ఏడాది ‘రేజర్’ అనే వైలెంట్ సినిమాతో ప్రేక్షకుల ముందుకు వచ్చిన రవిబాబు, ఇప్పుడు బాలీవుడ్‌లో తన అదృష్టాన్ని పరీక్షించుకోబోతున్నారు. బాలీవుడ్ స్టార్ హీరోయిన్ కంగనా రనౌత్ ప్రధాన పాత్రలో సురేష్ ప్రొడక్షన్స్ నిర్మాణంలో ఓ హారర్ థ్రిల్లర్‌ను అధికారికంగా ప్రకటించారు.
ఈ సినిమాకు ‘స్కేరీ పిక్చర్’ Scary Picture అనే ఆసక్తికరమైన టైటిల్‌ను ఖరారు చేశారు. రవిబాబు దర్శకత్వంలో కంగనా నటించబోతుండటం ఈ ప్రాజెక్ట్‌పై ప్రత్యేక ఆసక్తిని పెంచుతోంది.
హిందీలోనే విడుదల కానుందా?
ప్రస్తుతం ఈ సినిమాకు సంబంధించిన ప్రకటనలో తెలుగు వెర్షన్ విడుదల గురించి ఎలాంటి వివరాలు వెల్లడించలేదు. దీంతో ఈ ప్రాజెక్ట్‌ను హిందీ చిత్రంగానే రూపొందిస్తున్నారా అనే ఆసక్తి నెలకొంది. అయితే ఇతర భాషల్లో విడుదలపై స్పష్టత రావాల్సి ఉంది.
2027లో ప్రేక్షకుల ముందుకు!
రవిబాబు తనదైన హారర్, థ్రిల్లర్ మేకింగ్‌తో ఈసారి ఎలాంటి ప్రయోగం చేయబోతున్నారనేది ఆసక్తికరంగా మారింది. సురేష్ ప్రొడక్షన్స్ నిర్మాణం, కంగనా రనౌత్ ప్రధాన పాత్రతో ‘స్కేరీ పిక్చర్’పై అంచనాలు మొదలయ్యాయి.
ఈ చిత్రాన్ని 2027లో విడుదల చేయనున్నట్లు మేకర్స్ ప్రకటించారు. మరి రవిబాబు తన ప్రత్యేకమైన మేకింగ్‌తో బాలీవుడ్ ప్రేక్షకులను ఎంతవరకు ఆకట్టుకుంటారో చూడాలి!
