‘రాజు వెడ్స్ రాంబాయి’ సినిమాతో నటుడిగా మంచి గుర్తింపు తెచ్చుకున్న అఖిల్ రాజ్ ఇప్పుడు మరో ఆసక్తికరమైన ప్రాజెక్ట్తో ప్రేక్షకుల ముందుకు రాబోతున్నారు. ‘శనార్తి’ (shanarthi) అనే విభిన్నమైన టైటిల్తో తెరకెక్కుతున్న ఈ చిత్రంలో అఖిల్ రాజ్ హీరోగా నటిస్తున్నారు. ఈ సినిమాను దర్శకుడు సంపత్ నందికి చెందిన సంపత్ నంది టీమ్వర్క్స్, కె.వి. శ్రీధర్ రెడ్డికి చెందిన శ్రీ ధనలక్ష్మి ప్రొడక్షన్స్ సంయుక్తంగా నిర్మిస్తున్నాయి.
ప్రతిష్టాత్మక ఆదిత్య మూవీస్ సమర్పణలో రూపొందుతున్న ఈ చిత్రంతో సంపత్ నంది శిష్యుడు రాజ్ గణేష్ ఉప్పునూటి దర్శకుడిగా పరిచయం అవుతున్నారు. రామానాయుడు స్టూడియోస్లో పూజా కార్యక్రమాలతో ఈ సినిమా లాంఛనంగా ప్రారంభమైంది. పల్లెటూరి నేపథ్యంలో తెరకెక్కుతున్న ఈ చిత్రానికి సురేష్ బొబ్బిలి సంగీతం అందిస్తున్నారు.
తెలంగాణ సంస్కృతి, సంప్రదాయాలను కథలో భాగంగా చూపించబోతున్న ఈ సినిమా టైటిల్ పోస్టర్ తాజాగా విడుదలైంది. పోస్టర్లో పసుపు, ఎరుపు రంగులతో పాటు గాజులు, కంకణాలు ధరించిన రెండు చేతులు జోడించిన విజువల్ ఆకట్టుకుంటోంది. తెలంగాణ పల్లె వాతావరణాన్ని ప్రతిబింబించేలా పోస్టర్ను డిజైన్ చేయడంతో సినిమాపై ఆసక్తి పెరిగింది.
ఇక ఈ చిత్రంలో తెలంగాణ జానపద పాటలతో ఇప్పటికే మంచి గుర్తింపు తెచ్చుకున్న నాగదుర్గ హీరోయిన్గా నటిస్తున్నారు. గ్రామీణ నేపథ్యం, తెలంగాణ సంస్కృతి, ప్రేమకథతో ఈ సినిమా రూపొందుతున్నట్లు తెలుస్తోంది. ‘ఓదెల’ ఫ్రాంచైజ్ వంటి విజయవంతమైన చిత్రాలతో గుర్తింపు తెచ్చుకున్న సంపత్ నంది ఈ ప్రాజెక్ట్కు అండగా నిలవడంతో ‘శనార్తి’పై ప్రారంభం నుంచే అంచనాలు ఏర్పడుతున్నాయి.