నాచురల్ స్టార్ నాని హీరోగా, కయాదు లోహర్ హీరోయిన్గా నటిస్తుండగా.. శ్రీకాంత్ ఓదెల దర్శకత్వంలో తెరకెక్కుతున్న భారీ చిత్రం ‘ది ప్యారడైజ్’ The Paradise. ‘దసరా’ తర్వాత నాని, శ్రీకాంత్ ఓదెల కాంబినేషన్లో వస్తున్న సినిమా కావడంతో ఈ చిత్రంపై ప్రేక్షకుల్లో భారీ అంచనాలు నెలకొన్నాయి. సినిమా ఎప్పుడు విడుదలవుతుందా అని అభిమానులు ఆసక్తిగా ఎదురుచూస్తున్నారు.
ఈ సినిమాకు రాక్స్టార్ అనిరుద్ సంగీతం అందిస్తున్నారు. ఇప్పటివరకు ఈ చిత్రం నుంచి విడుదలైన రెండు పాటలు కూడా ప్రేక్షకులను ఆకట్టుకుని మంచి స్పందనను సొంతం చేసుకున్నాయి. ముఖ్యంగా ఇటీవల విడుదలైన ‘ఏశ నాగుల’ ఫోక్ సాంగ్ అనూహ్యమైన రీతిలో దూసుకెళ్తోంది.
పాట విడుదలైన సమయంలో దీనిపై సోషల్ మీడియాలో భిన్నమైన అభిప్రాయాలు వ్యక్తమయ్యాయి. కొందరి నుంచి నెగిటివ్ కామెంట్స్ కూడా వినిపించాయి. అయితే రోజులు గడిచేకొద్దీ ఈ పాటకు ఆదరణ పెరిగింది. ఇప్పుడు అదే సాంగ్ ఏకంగా అరుదైన రికార్డును సొంతం చేసుకున్నట్లు తెలుస్తోంది.
‘ఏశ నాగుల’ పాట కేవలం 17 రోజుల్లోనే 100 మిలియన్ వ్యూస్ మార్క్ను అందుకున్నట్లు సమాచారం. దీంతో టాలీవుడ్ నుంచి అత్యంత వేగంగా 100 మిలియన్ వ్యూస్ సాధించిన పాటగా ఈ ఫోక్ సాంగ్ నిలిచినట్లు తెలుస్తోంది.
ఇప్పటివరకు ఈ జాబితాలో 19 రోజుల్లో 100 మిలియన్ వ్యూస్ సాధించిన ‘ఊ అంటావా’ పాట రికార్డు ఉండగా.. ఇప్పుడు ‘ఏశ నాగుల’ దాన్ని అధిగమించినట్లు సమాచారం. దీంతో విడుదల సమయంలో వచ్చిన నెగిటివ్ కామెంట్స్ను దాటి ఈ పాట ఆల్ టైం రికార్డు స్థాయికి చేరుకోవడం విశేషంగా మారింది.
ఈ రికార్డుతో ‘ది ప్యారడైజ్’పై ఉన్న మ్యూజికల్ హైప్ మరింత పెరిగింది. అనిరుద్ అందిస్తున్న సంగీతానికి తోడు శ్రీకాంత్ ఓదెల మార్క్ టేకింగ్, నాని నటనపై భారీ అంచనాలు ఉన్నాయి. మరి పాటలతోనే ఇంతటి క్రేజ్ను సొంతం చేసుకున్న ‘ది ప్యారడైజ్’ సినిమా థియేటర్లలో ఎలాంటి ప్రభంజనం సృష్టిస్తుందో చూడాలి.
ఈ చిత్రం సెప్టెంబర్ 24న ప్రేక్షకుల ముందుకు రానుంది.
